Bota11 Nëntor 2022, 22:04

Britani e Madhe deporton 22 shqiptarë, Daily Mail zbardh fluturimin "sekret": Mes tyre persona me precedentë kriminalë

Shkruar nga Pamfleti
Britani e Madhe deporton 22 shqiptarë, Daily Mail zbardh fluturimin

Britania e Madhe ka deportuar drejt Shqipërisë në mënyrë sekrete, 22 shqiptarë, mes tyre persona me rekorde kriminale dhe emigrant të paligjshëm, shkruan media britanike, Daily Mail.

Shqiptarët e deportuar kanë mbërritur në Tiranë në orët e para të mëngjesit të së mërkurës. Ky është një veprim që vjen menjëherë pas deklaratave të sekretares së Brendshme Britanike, Suella Braverman e cila e ka cilësuar numrin e lartë të emigrantëve shqiptarë si një “pushtim”.

Sipas Daily Mail, mësohet se shumica e shqiptarëve të dëbuar u dërguan me furgona të blinduar drejt aeroportit nga ku u nisën drejt Shqipërisë. Bëhet me dije se mes të deportuarve përveç personave me rekorde kriminale, kishte edhe emigrantë të paligjshëm të cilët nuk kishin kërkuar azil por ishin kapur në ilegalitet.

Debatet mbi emigrantët e paligjshëm shqiptarë që mbërrijnë me gomone në Britaninë e Madhe kanë qenë në qendër të vëmendjes kohëve të fundit.

Ndërkohë, dy ditë më parë, u raportua për një marrëveshje historike mes Britanisë së Madhe dhe Francës sa i përket frenimit të emigracionit të paligjshëm

Bota #22 Shqiptarë #Deporton Britania