Vendimi më i rëndësishëm, ai për rifillimin e kampionatit, erdhi ditën e djeshme. Përfundimi nxorri që futbolli në Itali do të nisë që me datën 13 qershor, po ashtu do të luhet edhe me 14, kur janë vendosur të luhen dy gjysmëfinalet e kthimit të Kupës, Juventus-Milan dhe Napoli Inter. Vetëm tre ditë më pas, me datë 17 qershor, do të luhet finalja e Kupës, ndërsa me 20 qershor nis kampionati me katër ndeshjet e prapambetura të javës së 25, ku mes të tjerave është edhe Sampdoria-Inter.
Sakaq në vendimet e sotme u caktua që 12 javët e mbetura të Seria A të luhen çdo tre ditë. Të martën e 23 qershorit do të nisë java e 27, ndërsa sezoni do të mbyllet të dielën e dy gushtit, që është edhe afati i fundit i vendosur nga UEFA.
Me kalendarin e organizuar, është diskutuar dhe për oraret e ndeshjeve, ndërsa si opsione janë paraqitur ora 17:15, 19:30 dhe 21:45. Por lojtarët duan ta shmangin orarin e parë, atë të pasdites, duke qenë se në verë temperaturat do të jenë të larta.
Sa u takon lojtarëve që janë në huazim deri më 30 qershor, ata që nuk duan të qëndrojnë më mund të kthehen te ekipet që zotërojnë kartonin e tyre, por nuk do mund të aktivizohen. Dritarja e ardshme e merkatos është zhvendosur në vjeshtë, nis më 1 shtator dhe mbyllet më 5 tetor por me një kleçkë, futja e një kontrate paraprake për të mos u dhënë përparësi klubeve franceze dhe gjermane, të cilat duke qenë se nuk do luajnë në korrik, do e nisin pikërisht atëherë merkaton e verës.
