Shkruar nga Pamfleti
Shefat e Grupeve Parlamentare opozitare në Kosovë, derisa kanë folur në mbledhjen e përbashkët të Kuvendit të Kosovës dhe atij të Shqipërisë, janë pajtuar se të dy vendet duhet të kenë misione dhe qëllime të përbashkëta.
Abelard Tahiri nga Partia Demokratike e Kosovës është shprehur se e ardhmja e Kosovës dhe e Shqipërisë është e bashkuar.
“E ardhmja jonë është e bashkuar, bashkim në zhvillim, bashkim në progres, bashkim me zemër, bashkim me vlerat tona të përbashkëta europerëndimore, të afërt me njëri-tjetrin , të hapur ndaj fqinjëve, si dhe një aleancë e përhershme me ShBA-të dhe të integruar në NATO dhe në familjen e madhe evropiane, kjo është rruga jonë, kjo është e ardhmja jonë, ky është misioni ynë, ky është qëllimi ynë i përbashkët”, ka thënë ai.
Ndërsa, shefi i Grupit Parlamentar të AAK-së, Besnik Tahiri, ka thënë se është detyrë kombëtare që shqiptarët të bëhen popull lider në Ballkan.
“E kemi detyrë kombëtare, fal gjithë sakrificës që të punojmë dhe ta gjejmë rrugën që si njëri ndër popujt më të vjetër në Ballkan, të bëhemi popull lider në Ballkan, duket të jemi më të bashkuar, më të mirë, më të zhvilluar, më të përparuar dhe ta duam njëri-tjetrin më shumë. Këtë ua kemi borxh të gjithë atyre që kanë dhënë për Shqipërinë, shqiptarinë e Kosovën. Zoti e bekoftë Kosovën e Shqipërinë, Zoti e bekoftë këtë komb të bekuar”, ka thënë Tahiri.
