Ish-ministrja e Mbrojtjes dhe deputetja socialiste Mimi Kodheli, e ftuar në një studio televizive, diskutoi rreth ngjarjeve të fundit në Ballkan dhe në vend.
Kodheli i cilësoi si “tejet interesante” ngjarjet e fundit në Ballkan, ku veçoi firmën e protokollit për aderim të plotë në Nato të Maqedonisë së Veriut
Deputetja zbuloi që të enjten Parlamenti shqiptar do të kalojë për miratim këtë procedurë, duke qenë vendi i tretë pas Greqisë dhe Bullgarisë.
Sipas gjykimit të saj, procesi që ka zgjatur më shumë se 10 vjet, ka ngadalësuar jo vetëm procesin e integrimit të Maqedonisë së Veriut, por të gjithë rajonit.
Sa i përket protestës së opozitës më 16 shkurt, Kodheli shprehu mbështetjen e lirisë së cilitdo për të treguar mospëlqimin e tij, por theksoi se “ultimatum dhe demokraci” janë terma që nuk shkojnë mirë bashkë.
Ajo u shpreh se shqiptarët janë më të vështirë për t’u manipuluar nga një opozitë, që sipas saj ka shpalosur në Parlament vetëm banalitet që nuk ka fare të bej me legjislacionin.