Detaje të reja kanë dalë në dritë për vrasjen e ndodhur mbrëmjen e djeshme në Fushë Dukat, në afërsi të Orikumit, Vlorë. Sipas të dhënave, ekzekutorët duke pasur njohuri të mira rreth zonës, i kanë bërë pritë të riut Benjamin Bozhanaj, 27 vjeç.
Në momentin që pikasën të riun që lëvizte me makinë, autorët e fshehur pas një peme, i dolën para dhe derdhën breshërinë e plumbave. Dyshohet se Bozhanaj ka gjetur vdekjen e menjëhershme si pasojë e plagëve të marra. Në vendin e ngjarjes policia gjeti 22 gëzhoja dhe në trupin e viktimës u gjetën 8 plagë, të shkaktuar nga plumbat.
Edhe pse i riu e vuri re pritën që i ishte ngritur, ai eci me shpejtësi mbrapsht dhe tentoi të largohej, por nuk ia doli mbanë. E gjithë ngjarja dyshohet se ka ndodhur një orë e gjysmë para se të pikasej nga banorët e zonës, rreth orës 19:30. Deri në orë 21:00, Bozhanaj ka qëndruar i vdekur, më pas u pikas nga banorët e zonës.
Deri më tani policia ka shoqëruar 7 persona të dyshuar për ngjarjen, ndërsa ende nuk dihet cilët janë autorët. Pista kryesore e hetimeve mbetet ajo e larjes së hesapeve për pazare droge, duke u nisur edhe nga fakti që i riu kishte bërë burg në Itali për trafik të lëndëve narkotike.
