Detaje të reja janë zbuluar nga ngjarja e dhimbshme në Astir, ku 62-vjeçarja, Hava Osmënaj, humbi jetën pasi u hodh nga kati i 3-të për të shpëtuar nga flakët që përfshinë banesën e saj.
Mësohet se e moshuara ishte viktimë e dhunës së ushtruar nga i biri, Klodjan Osmënaj, i cili vuante nga probleme mendore.
Edhe pse e moshuara dhunohej vazhdimisht ajo asnjëherë nuk kishte kërkuar urdhër mbrojtje, apo të kishte bërë kallëzim në polici për dhunë në familje.
Mësohet se viktima e tragjedisë së djeshme nuk kishte pranuar që të pajisej me urdhër mbrojtje edhe kur i ishte ofruar, pasi sipas saj djali me probleme mendore kishte nevojë për përkujdesjen e saj.
Ekspertët ligjorë po punojnë për të gjetur vatrën e pare të zjarrit, e për të zbardhur rrethanat e plota të ngjarjes.
Në pamundësi për të dalë nga dera, Hava Osmënaj, 62-vjeçe dhe Klodjan Osmënaj, 36-vjeç, në çaste paniku, u hodhën nga ballkoni për t’u shpëtuar flakëve, ku Havaja, humbi jetën ndërsa djali i saj ndodhet ende në spital.
