Njeriu që ka qëndruar më gjatë në pushtet në Ballkan, prej vitit 1990 dhe që homolog ka vetëm Sali Berishën në Shqipëri, pritet të përgatisë largimin nga politika.
Bëhet fjalë për Presidentin e Malit të Zi, Milo Gjukanoviç, i cili ka qenë disa herë Kryeministër e disa herë Kryetar shteti i vendit të vogël të ish-Jugosllavisë.
Nesër zhvillohet në Podgoricë, Kongresi i DPS-së, Partisë Demokratike të Socialistëve, që është forumi më i lartë pas humbjes së 30 Korrikut të vitit të shkuar.
Siç bën të ditur televizioni i Beogradit, B92, pritet që të ndryshohet rreth 60% e udhëheqjes së DPS-së, e cila nuk ka lëvizur nga pushteti për rreth 30 vjet me radhë.
Kongresi i Jashtëzakonshëm do të zgjedhë kryesinë e partisë dhe këshillin e përgjithshëm, ndërkohë që kryetari do të zgjidhet nga anëtarësia sipas parimit “Një anëtar, një Votë”.
Vetë Gjukanoviç as nuk e ka mohuar, e as e ka pohuar largimin e tij.
Në një intervistë me agjencinë malazeze Mina, Gjukanoviç tha se kongresi i DPS që do të mbahet të Dielën do të jetë “vetëm një moment historik” në historinë e asaj partie, e cila do t’i ndihmojë ata të vazhdojnë më tej duke realizuar një vizion shumë të qartë, të qëndrueshëm dhe realist.
Gjukanoviç beson se kongresi do të jetë një mundësi për të njoftuar një fazë të re në jetën politike të DPS me ndryshimet që ata duan të ndërmarrin, të cilat, siç theksoi ai, nuk do të ndërhyjnë shumë në angazhimet e programit.
I pyetur nëse ai do të qëndronte në krye të DPS-së, Gjukanoviç tha se kjo ishte pjesë e agjendës.
“Si gjithmonë, ne do të flasim për këtë seriozisht. Kjo është hera e fundit që DPS zgjedh kryetarin në një mënyrë të tillë. “Statuti, të cilin unë besoj se do të miratojmë në kongres, përcakton se do të kemi një zgjedhje të drejtpërdrejtë të kryetarit të partisë më së voni në dy vjet,” tha Gjukanoviç.
Sipas Mina-s, programi i DPS, i cili do të miratohet në kongres, thotë se partia do të krijojë një aleancë politike që “do të kundërshtojë mohuesit e identitetit malazez dhe përpjekjet për të rrezikuar arritjet e referendumit të pavarësisë në 2006”.
Programi gjithashtu thekson se “manipulimi i ndjenjave fetare të një numri të qytetarëve malazezë, të drejtuar nga Kisha Ortodokse Serbe, shërbeu si një justifikim për të sulmuar vlerat themelore të Malit të Zi modern,” raporton B92. /Pamfleti
