Më 28 nëntor të këtij viti, komandanti legjendar, Adem Jashari, do t’i mbushte 67 vjet po të ishte gjallë.
Ai ka lindur më 28 nëntor të vitit 1955 në Prekaz të Skenderajt.
Komandanti legjendar vdiq në luftën kundër forcave serbe, të cilat kishin shënjestruar që moti shtëpinë e tij.
Më 5 mars 1998, që në orët e hershme, forca të mëdha të policisë serbe kishin mësyrë Prekazin.
Në shtëpi ndodheshin pothuajse tërë anëtarët e familjes. Sulmi mbi Jasharët dhe qëndresa heroike e tyre zgjatë tri ditë: më 5, 6 dhe 7 mars 1998.
Kjo luftë heroike, në historinë e re të Kosovës njihet me emrin Epopeja e Ushtrisë Çlirimtare të Kosovës.
Për figurën e Adem Jasharit kanë shfaqur mendime edhe personalitete të rëndësishme.
Administratori i parë ndërkombëtar i Kosovës, Bernar Kushner ka deklaruar se po të kishte Çmim Nobel për sakrificë për liri, ai do t’i takonte Adem Jasharit dhe familjes së tij.
Sot në ditëlindjen e tij të 57-të, presidentja e Kosovës, Vjosa Osmani, e ka kujtuar atë si hero i dinjitetit të vendit.
Osmani bëri homazhe te varri i tij dhe i familjes Jashari, të cilët u flijuan për liri.
“Ai hyri një herë në histori për të mbetur përherë dhe për t’u kujtuar veçanërisht më 28 nëntor, krahas Ditës së Flamurit dhe Pavarësisë së Shqipërisë. Një ditë dhe tri data historike”, ka shkruar Osmani në Facebook.
