Bosët e grupit “Ndraghet’a”, pazaret me kryebashkiakun e Tiranës, i bënë për pastrim miliardash me ndërtim kullash e resortesh, ndërkohë që pas atyre pazarave në Tiranë u dhanë 27 leje për kulla mbi 25 kate, për komplekse pallatesh dhe u dhuruan 437 mijë m2 troje e objekte pronë shteti, për trafikantë kokaine e prostitucioni, të tjetërsuar në biznesmenë ndërtimi, transportesh, ushqimesh, ilacesh, pastrimi, gazi mjekësor e fermash blegtorale, tipikisht siç kishin kërkuar bosët e “Ndraghet’a-s”
Skandali “Rezart Taçi”, me transfertë 18 milionë Euro të eksponenteve të një grupi mafioz italian, përforcon faktin se Shqipëria është “lavatriçe ndërkombëtare”, për të pastruar të ardhurat nga aktivitetet kriminale, me tranzitim tranfertash e investimesh.
Kjo skemë nuk bëhet me forcë, por me llogari bankare 48 orëshe dhe me sigurinë që u japin sekserët qeveritarë të lartë.
Pas Erjon Veliajt me grupin “Ndraghet’a”, Rezart Taçi e Francesco Zummo janë rasti i dytë brenda vitit 2021, që konfirmon se mafia italiane ka lidhje interesash me pushtetarët shqiptarë, për pastrim parash me transferta, hapje biznesesh shërbimi e ndërtime.
Krahasuar profilet, mund të thuhet, se kryebashkiaku Erjon Veliaj ka profilin e ish-kryebashkiakut mafioz të Palermos, “Don” Vito Ciancimino, i cili ishte pjesë aktive mbështetëse dhe financiare e bosit Francesco Zummo të grupit mafioz “Cosa Nostra”.
Dhe “Don” Erjon Veliaj i Tiranës, ashtu si “Don” Vito Ciancimino i Palermos, ka të njëjtën skemë mashtrimi, falsifkimi, kanalizmi dhe përqendrimi mafioz të fondeve dhe pasurive publike, në disa duar personash që kontrollohen prej tij.
Në pozicionin që kryebashkiaku “Don” Vito Ciancimino i Palermos ka qenë me grupin “Cosa Nostra”; është dhe kryebashkiaku Erjon Veliaj, me grupin “Ndraghet’a” dhe me biznesmenë trafikantë e vrasës në Shqipëri, të cilëve u jep tendera, koncesione, troje e leje ndërtimi.
Mafiozi “Don” Vito i Palermos, ishte kapur për fyti nga bosët Francesco Zummo, Fabio Petruzzella, Daniele Cestagalli etj., të cilët administronin financiat dhe pasuritë e Bashkisë.
Ndërsa “Don” Erjon Veliaj i Tiranës, është kapur nga ndërtuesit trafikantë kokaine Shkëlqim Fusha, Bashkim Ulaj, Armand Lilo, Shkëlqim Kupa, Fatmir Kuçi e Mihal Delijorgji, dhe nga ndërtuesit “lavatriçe” Pëllumb Salillari, Sadri Abazi, Gentian Sulaj, Milo Gjikuria etj. etj.
Ashtu si “Don” Vito Ciancimino i Palermos, dhe “Don” Erjon Veliaj i Tiranës, i ka krijuar anëtarëve të grupit mafioz të njohur si oligarkë, mundësi për vjedhje e pastrim parash, zona ndërtimi, transaksione me cikël të mbyllur brenda Bashkisë dhe investime në çdo sektor.
Psh., bosët e “Ndraghet’a”, në bisedat me Erjon Veliajn, i kanë kërkuar të bënin pastrim miliardash me kulla, resorte, investime e shërbime publike, blerje pronash, tendera e koncesione.
Pas atyre pazarave, nga qershori 2017 deri më 30 qershor 2021, Erjon Veliaj i ka dhënë trafikantëve, licensa e leje ndërtimi për 27 kulla nga 25 kate të lartë, ka dhënë leje për 2 kulla 85 e 100 metër të larta, ka dhënë leje ndërtimi për 13 komplekse pallatesh mbi 12-15 kate.
Vetëm gjatë viteve 2018-2020, këtyre trafikantëve me maskë biznesmeni e firma “bija” të kompanive mafioze offshore, Don Erjon Veliaj u ka dhënë 65 milionë Euro tendera e koncesione, 18 leje resortesh në parqet kombëtare dhe 437 mijë m2 troje e objekte pronë shteti.
Me menaxhim të Erjon Veliajt dhe leje të “Kubesë” Edi Rama, grupi “Ndraghet’a” është prezent me pastrimin e parave, duke bërë investime publike private, të përfaqësuara nga trafikantë kokaine e prostitucioni, të tjetërsuar në biznesmenë ndërtimi, transportesh, ushqimesh, ilaçesh, pastrimi, gazi mjekësor e fermash blegtorale, tipike siç kishin kërkuar bosët e “Ndraghet’a”.
Edhe SPAK ka indicie, prova e emra konkret, se bosët e “Ndragheta” Antonio Gallo, Saverio Brutto, Besnik Halili etj., qëndrojnë pas kullave me financim 40-50 milionë Euro si ajo te Sahati dhe ish-Ekspozita “Shqipëria Sot” në Tiranë, si dhe te 8 resorte në Lalz e Himarë./Pamfleti
