Teksa Prokuroria e Posaçme ka thelluar hetimet për aferën me pronat e kompleksit “Partizani”, një nga të akuzuarit kryesorë ka kthyer sytë nga Zoti.
Jamarbër Malltezi, dhëndri i ish-kryeministrit Sali Berisha ka ndërtuar një xhami te kompleksi i pallateve që ngriti te ish-Kompleksi Partizani. Kur u grabitën pronat e këtij Kompleksi, pjesë mori dhe Malltezi, i cili është i padituri kryesor në SPAK për këtë aferë. Por duket se ai tani ka filluar të kërkojë ndihmën e Perëndisë.
Ai ka hedhur një foto ku i duket vetja si Imam, ndërkohë që ka bërë dhe një postim në rrjetet sociale.
“Lavdi Zotit faltorja në Magnet u përurua sot për besimtarët. Brezit të gjyshërve tanë komunizmi jua grabiti pronat dhe ndonëse nisën procesin e kthimit të pronës ata vdiqën e nuk gëzuan dot. Sot po gëzojmë pronën e te parëve që bënë sakrificat.
Falënderojmë Zotin që na e mundësoi dhe të lëmë ca shenja që të jenë për shumë e shumë kohë edhe kur mos jemi më në këtë jetë. Faleminderit Adi Banaj si promovues, kurator dhe koordinues i besimtarëve që donin të kontribuonin në vend-faljen për të nderuar e kënaqur të madhin Zot! Falënderojmë disa dhjetëra besimtarë që kontribuan me bujari që kjo faltore të kurohej në çdo detaj nga Adi.
I lutemi Zotit të na pranoje këtë faltore si vend për të nderuar Zotin, si vend për promovimin e familjes dhe si qendër tolerance e dije. Falënderojmë Dorian Demetja që filloi qysh sot si imam dhe mësues i brezit të ri në këtë faltore. Zoti i ndriçoftë mendjen dhe i pastroftë shpirtin të gjithë besimtarëve dhe banoreve të këtij kompleksi”, shkruan Malltezi.
