Aktualitet21 Dhjetor 2018, 08:58

Drejtimi që do të marrë populizmi në Evropë në vitin 2019

Shkruar nga Pamfleti
Drejtimi që do të marrë populizmi në Evropë në

Drejtimi që do të marrë populizmi në Evropë në vitin 2019

Forcat populiste u kthyen fuqishëm në Evropë në vitin 2018, duke marrë pushtetin në Itali dhe duke u konsoliduar në vende si Hungaria dhe Polonia. Në Francë, protestat nëpër rrugë shpërthyen me kërkesa për dorëheqjen e presidentit. Vala populiste mund të ketë implikime të mëdha në zgjedhjet e Parlamentit Evropian, të parashikuara për vitin 2019 ku forcat centriste përballen me sulme si nga e djathta, ashtu edhe e majta.

Në fund të vitit 2018, populzimi në Evropë ka një ngjyrë të re: të verdhë.

Lëvizja e “jelekëve të verdhë” shpërtheu në Francë, si protestë kundër taksave për karburantin dhe u shndërrua në demonstrata në gjithë vendin.

“Bëhet fjalë për njerëz të vërtetë, jo njerëz që shtiren sikur janë diçka që nuk janë”, thotë Jean-Francois, një protestues.

Presidenti Emmanuel Macron, që dikur shihej si njeriu që frenoi marshimin e populizmit, u tërhoq duke shtyrë ngritjen e taksave.

Ç’do të thotë kjo? Që populizmi është kthyer në forcë politike.

“2018-a ishte viti i rikthimit të valës. Unë mendoj se ishte gabim të besohej se vala ishte ndalur. Në fakt thjesht ishte fshehur pas Macronit”, thotë Grégory Claeys, i Institutit Bruegel për Politika.

Por populizmi I 2018-së ka një ndryshim. E djathta ekstreme dhe e majta ekstreme marshuan së bashku.

“Më parë shihnim populizëm të krahut të djathtë, kryesisht në Evropën Lindore dhe kjo falë frikës së imigracionit dhe çështjeve të identitetit, ndërsa në jugun e Evropës, kishim më shumë populizëm të majtë, sepse ky është rajoni që është prekur më shumë nga kriza financiare, kriza e Euros e të tjera. Prandaj të dyja janë si të veçanta. Por tani shikojmë në vende si Italia dhe Franca, i kemi të dyja njëkohësisht”, thotë zoti Claeys.

Kjo lloj bashkëjetese u zyrtarizua në Itali, kur Lëvizja e krahut të majtë Pesë Yjet dhe Liga e së djathtës ekstreme, formuan një qeveri koalicioni në maj.

Kauza e tyre e përbashkët: ndalja e valës së imigrantëve në brigjet italiane dhe ndërprerja e shkurtimit të shpenzimeve. Kjo e ka vënë Romën në konflikt me Bashkimin Evropian.

Ministri i Brendshëm, Matteo Salvini, që shihet këtu me udhëheqësen e së djathtës ekstreme të Francës Marie Le Pen, është bërë fytyra e populzimit kundër BE-së.

“Armiqtë e Evropës, janë ata që janë mbyllur në bunkerin e Brukselit”, thotë ai.

Tronditur nga tërmetet politike, Bashkimi Evropian ka paralajmëruar se liritë themelore janë në shënjestër.

“Jetojmë në një botë të karakterizuar nga rilindja e forcave populiste dhe retorikës shkatërruese”, shprehet Antonio Tajani, Presidenti i Parlamentit Evropian.

Në Spanjë, që dikur shihej si e imunizuar nga politika e së djathtës ekstreme, partia populiste ‘Vox’ po forcohet.

“Këto lëvizje politike nuk do të shuhen. Ato do të jenë këtu për dekada të tëra”.

Por populsitët kanë konkurrencë. Partia e Gjelbër pro-evropiane, është fuqizuar në Gjermani, duke e ulur “Alternativën për Gjermaninë” të së djathtës ekstreme në vend të katërt.

Në Hungari, protestat e rrugëve kanë shpërthyer kundër qeverisë populiste të Viktor Orbanit.

Copëzimi i politikës evropiane, mund të ketë implikime të mëdha për zgjedhjet e Parlamentit Evropian, në maj 2019.

Pasi kanë fituar terren në disa kryeqytete në gjithë Evropën, në vitin 2019 forcat populiste do të përpiqen të marrin frenat e pushtetit edhe në vetë Bashkimin Evropian./VOA

 

Forum emmanuel Macron populizmi