Jemi para një situate, kur përveç pastrimit të klasës së vjetër e të korruptuar politike në vend, na duhet edhe spastrimi i klasës së korruptuar mediatike.
Nëse babëzia e korrupsionit të politikës në Shqipëri ka ecur pa ndalim, ka peshën e vet edhe mjedisi mediatik. Pra media, dëshmi që doli në sytë e të gjithëve me publikimin e pagave. Ku pikërisht njerëzit që merren me përpunimin e opinionit publik, paguheshin me shuma marramendëse; para që vinin nga dërgesat e PPP-ve apo koncensioneve.
Por ajo që pamë ishte vetëm maja e ajsbergut, pasi bëhet fjalë për shuma që nuk deklarohen e që janë shumë më të mëdha.
Arsyeja përse ata marrin aq para është se relativizojnë korrupsionin, mbrojnë hajninë, quajnë normale realitetin e tmerrshëm korruptiv të PPP dhe koncensioneve.
T’i referohemi debatit për çështjen e kullave që u fol se do të ndërtoheshin në vendin ku është sot selia e PD-së.
Arjan Çani, tha në një media, se është normale që një parti të ndërtojë pallate e kulla, pasi pa para nuk vjen dot në pushtet.
E kjo deklaratë është vetëm njëra nga ato qëndrime mediatike që kanë trullosur njerëzit. Kjo lloj deklarate, edhe pse fshihet me logjikën “naive interesante”, është pikërisht kanceri që ka pushtuar vendin.
Ngase, sido që të jetë realitet çështja e korrupsionit dhe e klientelizmit, nuk duhet që media të marrë në mbrojtje zyrtarët që zaptojnë trojet publike dhe bëjnë korrupsion me fondet e shtetit.
Qëndrimi i Çanit, ka një qëllim të caktuar, pasi synohet që babëzia e pasurive të Sali Berishës dhe Ilir Metës, të cilët janë shumë afër përfundimit në Prokurori, të viktimizohet si një manovër për të luftuar Edi Ramën.
E ky është skandali më i madh; pasi nëse Edi Rama është i korruptuar, media duhet të japë modelin e kundërt të zyrtarëve që nuk korruptohen, e nuk zaptojnë trojet publike për të ndërtuar kulla që i kanë në pronësi oligarkët etj.
Keni parë nga aktorë mediatikë të rëndësishëm që të sulmojnë Sali Berishën e Ilir Metën për pasurinë marramendëse të tyre dhe të familjarëve të tyre. Madje edhe kur e bëri SHBA me anë të institucionit më të rëndësishëm të saj siç është qeveria, duke shpallur Sali Berishën ‘Non Grata’ për “korrupsion të rëndësishëm”, këta aktorë mediatikë sulmuan Amerikën.
Jemi para një situate, kur përveç pastrimit të klasës së vjetër e të korruptuar politike në vend, na duhet edhe spastrimi i klasës së korruptuar mediatike.
Realisht kjo e dyta do të jetë shumë e thjeshtë, sapo të bjerë e para e të shuhen pagesat nën dorë të zyrtarëve “me shumë para që duan të vijnë në pushtet”…/Pamfleti
