Gazetari Eni Ferhati thotë se me shumë gjasa ka qenë Nuredin Dumani ai që ka ndihmuar drejtësinë për të zbuluar një sërë krimesh të rënda. Sipas Ferhatit, Dumani mund të ketë marrë dhe statusin e “bashkëpunëtorit të drejtësisë”.
Gazetari tregoi se ka siguruar informacione nga deklaratat e Nuredin Dumanit dhe Enrik Hoxhaj si dhe celularët e tyre.
“Për një vrasje të dyfishtë persona të caktuar do paguheshin në vlerën e një milion eurove shpërblim,” – tha Ferhati për Euronews.
Shifër kjo e cila vërteton se viktimat kanë pasur një status të lartë në hierarkinë e grupeve kriminale.
Vlen të theksohet se, ditën e sotme, SPAK ka goditur 8 grupe kriminale, 4 në Elbasan, 3 në Tiranë dhe 1 në Durrës. Suel Çela që cilësohet si një ndër “të fortët” nuk ka mundur të arrestohet dhe nga operacionet janë kapur vetëm persona të “dorës së dytë”.
