Disa tifozë, në fund të një ndeshjeje amatore futbolli në Honduras, pushtuan fushën. Ata dukeshin të vendosur për t’i kërkuar llogari gjyqtarit, për zgjedhjet e tij gjatë lojës.
Megjithatë, “bilbili” nuk qëndroi duarkryq, derisa të hante ndonjë grusht apo shkelm të fortë, por nxori një pistoletë që e mbante me vete dhe kreu disa të shtëna paralajmëruese.
Që tifozët të kundërshtojnë gjyqtarin, është një skenë mjaft e njohur në një ndeshje futbolli. Por, gjyqtari që vendos t’i shuajë protestat ndaj tij, duke nxjerrë një armë dhe qëlluar disa herë, shihen rrallë nëpër stadiume.
Kjo ndodhi së fundmi në La Jigua, Copán, në Hondurasin Perëndimor. Tifozët e kishin menduar ndryshe situatën, por hasën një një reagim të frikshëm. Sikurse mund të shihet në një video, e cila u bë menjëherë ‘virale’ në rrjetet sociale, gjyqtari paska qenë trim nga… frika.
Fundja, dy duart për një kokë janë. Pamjet e paprecedenta u transmetuan gjithashtu nga TN5, një program i rëndësishëm lajmesh në vend. Në to duken qartë veprimet e gjyqtarit.
Ai nxjerrë një armë për t’i përzënë lojtarët dhe tifozët që po e kundërshtonin dhe gjuan disa herë. Midis turmës që ka mësyrë fushën, ka nga ata që edhe qeshin. Dikush tjetër komenton: “Ai nxori pistoletën. Gjyqtari mban armë”.
