Shtabi i hajdutëve dhe heshtja e drejtësisë/ Tenderët janë bërë në të njëjtën ditë e orë në Autoritetin Rrugor, përfaqësues i të dy firmave gjoja kundërshtare, ka qenë nipi i deputetit, ndërsa në fund të procedurës, me propozim të komisionit, janë shpallur “fituese” si bashkim operatorësh, të dyja firmat “Alko Impex General Construction” e “Alko Impex Construction”
Përveç mungesës së garës, numrit të shumtë të tenderëve në vlera mbi 1 milionë Euro, dy firmat ndërtuese të deputetit socialist Sadri Abazi, kanë filluar të marrin miliarda lekë fonde publike, si gjoja firma “rivale” që garojnë në të njëjtët tendera.
Ky falsitet e mashtrim ligjor, ka nisur në Autoritetin Rrugor Shqiptar (ARRSH), ku firma “Alko Impex General Construction” dhe firma “Alko Impex Construction” të deputetit Abazi, janë paraqitur si rivale, në 2 tenderët me objekt: Mirëmbajtje rrugësh rurale në disa zona të Qarkut-Elbasan dhe të Qarkut-Dibër.
Të dy tenderët, janë bërë në të njëjtën ditë e në të njëjtën orë nga ARRSH, ndërsa përballë komisionit për të dy firmat e paraqitura si “rivale”, ka qenë i njëjti person: Arbër Abazi; i cili kishte dorëzuar oferta të njëjta.
Për ta bërë më të besueshme lojën dhe për të justifikuar ligjërisht falsitetin e garës së tenderit, komisioni i ARRSH-së ka propozuar që për të dy tenderët, fimat rivale të Sadriut: “Alko Impex General Construction” e “Alko Impex Construction”, të shpallen fituese, duke u trajtuar si bashkim operatorësh.
Në tenderin e mirëmbajtjes së rrugëve rurale të disa fshatrave të Qarkut-Elbasan, vlera fituese ka qenë 181.126.549 milionë lekë të reja me TVSH, ose 99.5% e vlerës së fondit limit.
Ndërsa në tenderin e mirëmbajtjes së rrugëve rurale të disa fshatrave të Qarkut-Dibër, vlera fituese ka qenë 111.667.173 milionë lekë të reja me TVSH, ose 99.7% e vlerës së fondit limit.
Që deputeti Sadri Abazi, t’i ketë të garantuara edhe këto dy kontrata me vlerë 2.9 miliardë lekë, ministrja Balluku ka urdhëruar shefat e ARRSH, që tenderët të bëhen me afat 4 vite; siç ka marrë dhe 14 milionë Euro tendera pastrimi në Kajavë, Durrës, Kukës, Shkodër, Kamëz, Sarandë etj./Pamfleti
