Deklarata e shefit të selisë blu, se është i gatshëm për të çuar reformën zgjedhore deri në fund u mirëprit nga trupi diplomatik në vend.
Kryetari i PD Lulzim Basha tha në një intervistë të dhënë së fundmi, se kryeministri Edi Rama nuk do ndryshim sistemi dhe se në tryezën për Reformën Zgjedhore nuk mund të arrijë konsensus për këtë gjë.
“Ka një keqkuptim që tryeza mund të arrijë konsensus për sistemin. Edi Rama nuk do ndryshim sistemi. Absolutisht po. Kam bërë publike që në janar që unë jam për një sistem maxhoritar me dy dhoma duke ruajtur të njëjtin numër legjislatorësh, 100 deputetë dhe 40 senatorë, por duke i dhënë mundësinë popullit që të ketë dy dhoma për të kontrolluar qeverinë dhe duke i dhënë qeverisë detyrimin për të kaluar në dy nivele para se të marrë vendime të tilla siç ka marrë ky që i ka falur gjysmën e Shqipërisë, bregdetin, naftën, minierat, një grushti njerëzish“, u shpreh kryedemokrati.
Kreu i PD theksoi se edhe nëse nuk do kishte ndryshim sistemi, nëse zgjedhjet do ishin të lira dhe të ndershme, opozita do të fitonte thellë ndaj regjimit të Ramës.
“Nëse ka zgjedhje të lira e të ndershme opozita e bashkuar është krejtësisht konfidente në një fitore të thellë kundër këtij regjimi. Dhe ajo që është sfida jonë është menaxhimi i pritshmërive të shqiptarëve për t’i nxjerrë nga kjo krizë e thellë në veçanti ekonomike sepse në këtë moment që flasim ky është preokupimi kryesor i çdo familje shqiptare dhe s’mund të jetë gjë tjetër veçse preokupimi kryesor i imi gjithashtu“, vijoi Basha.
