Deputeti i Partisë Demokratike, Edmond Spaho, ka kritikuar fjalimin e ministres së Financave, Delina Ibrahimaj, për aktin normativ të kompensimit të kompanive të ndërtimit.
Sipas Spahos, ministrja ka katër muaj që lexon të njëjtin fjalim në Kuvend dhe nuk ka thënë asgjë konkrete për aktin normativ.
“Nuk është normale që ministrja e Financave vjen me të njëjtin fjalim që ka mbajtur për Butrintin dhe luftën në Ukrainë, vjen tani dhe shpjegon edhe aktin normativ. Të vijnë e të na thonë 5 gjëra që kanë të bëjnë me aktin normativ. Të ngelemi në debatin për çështjen dhe jo të dëgjojmë të njëjtat histori nga kjo zonjë”, ka replikuar Spaho.
Sipas këtij akti normativ, kompanitë e ndërtimit do të kompesohen me 6 miliardë lekë për shkak të rritjes së materialeve që përdorin. Kjo ka sjellë debate të forta në kuvendin e sotëm mes opozitës dhe mazhorancës.
