Ernest Muçi vazhdon të tregojë se tashmë e meriton plotësisht të jetë titullar në çdo ndeshje te Lexhia e Varshavës. Loja e mirë e sulmuesit të talentuar, po ndiqet edhe nga golat që ai po shënon në edicionin e tij të dytë në futbollin polak.
Sot, Lexhia luante një sfidë të vështirë në transfertë ndaj Gornik Zabërze dhe e pa veten në fund të pjesës së parë në disavantazh të dy golave, një prej të cilëve i shënuar nga Lukas Podolski, i cili është kthyer që të mbyllë karrierën në vendin e origjinës.
Por, Lexhia ia doli të kthente sfidën, duke shkurtuar fillimisht shifrat me Vieteska, e më pas në minutën e 54, duke barazuar gjithçka me Ernest Muçin. Ky i fundit u tregua i aftë që në zonë të gjuante me forcë, duke bërë që portierit t’i shpëtonte topi nga duart dhe të përfundonte në rrjetë, për të ringjallur shanset e skuadrës së tij.
Ky është goli i 3 në këtë kampionat për Muçin, në 11 ndeshje të luajtura. Ndërkohë, ai ka shënuar 1 gol e dhënë 1 asist në ndeshjet në Europë në këtë sezon për skuadrën polake.
