Agjencia Evropiane e Barnave (EMA) ka thënë në një deklaratë se secili shtet duhet të vendosë vetë nëse do ta përdorë vaksinën AstraZeneca për të injektuar popullsinë apo jo. EMA ka nxjerrë përfundimin se pas marrjes së vaksinës AstraZeneca, ekziston rreziku i mpiksjes së gjakut.
Secili vend kur të marrë një vendim në lidhje me AstraZenecën, duhet të ketë parasysh situatën aktuale epidemiologjike dhe disponueshmërinë e vaksinave të tjera, njoftoi EMA.
“Ne jemi përpjekur të sigurojmë sa më shumë informacion të jetë e mundur në lidhje me përfitimet dhe rreziqet që kemi identifikuar, dhe bazuar në atë, dhe duke marrë parasysh situatën aktuale me pandeminë dhe mundësinë e prokurimit të vaksinave të tjera, shtetet mund të marrin vendime të ndryshme në lidhje me vaksinën AstraZeneca”, tha sot drejtoresha e EMA Emer Cooke.
Në këtë mënyrë, Agjencia Evropiane e Barnave ka hequr dorë nga rekomandimet dhe shtetet do të duhet të vlerësojnë vetë rreziqet e vazhdimit të përdorimit të vaksinës AstraZeneca. Ndërkohë që Spanja dhe Belgjika kanë dhënë lajmin se nuk do e japin vaksinën AstraZeneca për grupmoshat nën 60 dhe 55 vjeç, Britania e Madhe dha njoftimin se nuk do ta përdorë vaksinën për personat nën 30 vjec.
Rekomandimi erdhi pasi entet rregullatore si në Britani, ashtu edhe në Bashkimin Evropian theksuan se përfitimet nga marrja e vaksinës vazhdojnë t’i tejkalojnë rreziqet e efekteve anësore për shumicën e njerëzve. Autoritetet britanike rekomanduan që personave nën 30 vjeç t’u ofroheshin vaksina të tjera alternative.
Çdo masë në këtë drejtim po vëzhgohet nga afër pasi vaksina, e cila është më e lirë dhe më e lehtë për t’u ruajtur se shumë të tjera, është kritike për fushatat globale të imunizimit. Ajo konsiderohet si shtyllë e programit të mbështetur nga OKB-ja, i njohur me emrin COVAX, i cili synon të furnizojë me vaksina disa nga vendet më të varfra të botës. Konferencat për shtyp të enteve rregullatore të BE-së dhe Britanisë u zhvilluan në të njëjtën kohë të mërkurën pasdite. Rezultatet e hetimeve lidhur me raportet për mpiksje të gjakut ngjallën shqetësim në lidhje me shpërndarjen e vaksinës së AstraZeneca-s.
