Iku Sulltani por ka lënë prapa një sherr të madh në dy fronte.
Fronti i parë është lufta e egër që ka nisur brenda muslimanëve shqiptarë, mbështetës dhe jo të presidentit të Turqisë. I cili ka dhënë një ultimatum për të larguar deri në muajin e Ramazanit ekipin drejtues të Komunitetit Musliman Shqiptar.
Kjo përplasje po udhëhiqet nga ish-grupi drejtues i KMSH-së që përfaqësohet nga ish-kryemyftiu Ylli Gurra, nga Librazhdi, një imam që shkon majtas dhe votues i PS-së dhe Justinian Topulli- gjirokastrit, ish-kreu i Lidhjes së Hoxhallarëve, i cili është mbështetës dhe votues i PD-së.
Përplasja ka nisur e fortë, madje po prek edhe kufijtë e politikës. Topulli, i ka bërë thirrje të hapur Sali Berishës që të ndalojë mbështetjen ndaj Gulenistëve. Në fakt, nuk se ka pasur një mbështetje politike nga Berisha për njerëzit e lëvizjes guleniste, por ata kanë kundërshtuar ultimatumet e Erdogan ndaj qeverisë shqiptare për punët e brendshme të vendit.
“I bëj thirrje Sali Berishës, edhe si i djathtë, dhe njerëzve pranë tij, që të mos përlyhen kot me punët e KMSH dhe gylenistëve uzurpatorë, duke u bërë vegël e shpifjeve dhe mashtrimeve të këtyre të fundit. Është në të mirë të tij dhe grupit që ai përfaqëson që luftën politike kundra qeverisë, të mos e përziejnë me gjëra që nuk i dinë. Për një njeri që e mban veten të djathtë dhe parimor, qëllimi nuk justifikon mjetin”, shkruan Topulli.
Ndërkaq, nga ana tjetër, në mënyrë të fshehtë, ministria e Arsimit ka dërguar një pyetsor në shkollat e vendit, ku kërkon mendim në lidhje me futjen e turqishtes si gjuhë të dytë në shkollat shqiptare.
Në këtë rast, kemi të bëjmë me një nismë tinzare, ngaqë efektivisht turqishtja është prezente në vend, pasi ka një rrjet shkollash e kolegjesh turke deri në universitet që prej 30 vjetësh, madje edhe një katedër turqishteje në Universitetin e Tiranës.
Pra kemi një prezencë të mësimit të kësaj gjuhe, por futja e fshehtë si gjuhë e dytë në shkollat 9 vjeçare është krejt e pakuptimtë, çka mund të prodhojë dhe inate që mund të infektojnë marrëdhëniet me Ankaranë.
Nëse ka një kërkesë nga qeveria turke për futjen e turqishtes në shkolla kjo duhet bërë publike, e vetëm nëse do të jenë dakord prindërit, do të duhet që të futet si lëndë mësimore. Ajo që është më e kërkueshme nga qytetarët është që gjuhë e dytë të jetë gjermanishtja më shumë se turqishtja, ngaqë të gjithë synojnë që të shkollojnë fëmijët në universitetet gjermane e të shkojnë të emigrojnë atje.
Për Turqinë, përveç turizmit dhe mjekimit në spitalet turke, nuk ka një interes për tregun e punës. Gjithsesi, nuk se është një gjë dramatike nëse do të bëhej me transparencë, ngaqë mësimi i një gjuhe është kulturë. Por preferenca duhet lënë në mënyrë fakultative, e jo të bëhet me urdhër, pasi përpara turqishtes shqiptarët preferojnë gjuhët europiano perëndimore. Kur hoqën italishten që e flisnin thuajse të gjithë shqiptarët nga shkollat, futja e turqishtes me fshehtësi përbën realisht një vendim problematik… /Pamfleti
