Në vendimin e Gjykatës së Shkallës së Parë, thuhet se Salianji u përfshi në kallëzim të rremë për interesa politike të tij dhe të PD-së.
Deputeti demokrat Ervin Salianji rrezikon të përfundojë në burg.
Në vitin 2019 ai u dënua me 1 vit burg për mashtrim me çështjen “Babale”, por vendim nuk mori formë të prerë. Çështja shkoi në Gjykatën e Apelit, e cila do të vendosë vendimin final. Më 4 korrik do të mbahet seanca e parë gjyqësore ndaj Salianjit dhe Jetmir Olldashit dhe nëse Apeli lë në fuqi vendimin e Shkallës së Parë, deputeti duhet të arrestohet menjëherë.
Relatore është Edlira Petri, e cila ka në dorë edhe vendimin për statutin e PD. Berisha e ka sulmuar fort kohët e fundit dhe si duket kjo është arsyeja. Salianji e drodhi pas largimit të Bashës dhe vajti në krahët e Berishës. Sot mediat e deputetit “non grata” janë hedhur në sulm ndaj gjyqtares, duke dhënë sinjale se të hënën mund të ketë zhvillime të forta.
Rasti në fjalë ka të bëjë me audiopërgjimin ndaj ish-ministrit Fatmir Xhafaj. Në atë kohë dolën disa përgjime, ku flitej së vëllai i Xhafajt merrej me trafiqe. Pas hetimeve, prokuroria u shpreh se e gjitha ishte montazh për të dëmtuar figurën e ish-ministrit dhe shpalli fajtorë Ervin Salianjin dhe gazetarin Olldashi, të cilët u dënuan me 1 vit burg dhe 6 muaj burg. Ndërkohë u dënua me 2 vite burg Fredi Alizoti, i cili ishte paguar duke trilluar historinë.
Në vendimin e Gjykatës së Shkallës së Parë, thuhet se Salianji u përfshi në kallëzim të rremë për interesa politike të tij dhe të PD-së.
Sipas Gjykatës biseda e stimuluar mes Albert Veliut dhe Fredi Alizotit është regjistruar në janar 2018 në një mjet përgjimi stilolaps të cilin Albert Veliua ia ka dorëzuar Ervin Salianjit, ndërsa të dy bashkë janë takuar që një vit më parë.
Gjithashtu sipas Gjykatës Penale, Albert Veliu i njohur si Babalja, i cili u dënuar me 3 vite e 8 muaj burg, u akomodua në Selinë e Partisë Demokratike ku edhe ka dhënë intervistë.
“Fredi Alizoti stimuloi zërin e Agron, Geron Xhafës në janar 2018. Mes të pandehurve Veliu, Alizoti, Salianji, Jetmir Olldashi ka komunikime të shpeshta para e pas veprës penale. Pas publikimit të audio- përgjimit ka biseda kompromentuese. Salianji realizoi takimin e Babales me gazetarin Olldashi. Në tetor 2017 Albert Veliu ka takuar Ervin Salianjin. Nga tabulatet rezulton se zërin e Agron Xhafës e bëri Alizoti. Nuk ka asnjë shpjegim tjetër komunikimet e tyre të shpeshta veç përfshirjes në audiopërgjim pasi nuk kanë lidhje farefisnore me njëri-tjetrin. Kjo veprimtari e kallëzimit të rremë nuk mund të konsiderohet e kryer brenda fushës së ushtrimit të funksionit politik të deputetit apo ushtrimit të lirisë së shprehjes”, shprehet gjykata.
