DOKUMENTE ZYRTARE/ Qysh prej datës 20 dhjetor 2018, shërbimet speciale e mbanin në survejim biznesmenin e resortit “Adorions Palace”, si shtetas i huaj që nuk i ishte miratuar leja e përhershme për qëndrim e aktivitet në territorin e Shqipërisë; dhe me Urdhër Nr.07/1, datë 17.01.2019, duhej të largohej nga Shqipëria; ndërkohë që shtetësinë shqiptare e kishte lënë qysh më 26 nëntor 2004 në moshën 21-vjeçare
Më 30 korrik 2020, biznesmeni 37 vjeçar, Eugert Lazaj, është gjetur pa jetë në vilën e tij në private, brenda kompleksit rezidencial “Rolling Hills” në Farkë-Tiranë, me 1 armë pranë vehtes, që sipas të dhënave të para policore, dyshohet se është vetëvrarë.
Gjthësesi, për aq kohë, sa ende nuk ka gjurmë konkrete, për një nga dy versionet; nuk mund të thuhet, nëse është vrasje e sofistikuar nga rivalë hesapesh personale e konkurrentë biznesi, apo vetëvrasje për motive që i dinte vetëm ai.
Por një burim nga Drejtoria e Kufirit dhe Migracionit-Tiranë, na ka dhënë info shkresore; sipas të cilës, pronari i resort “Adorions Palace” në Maminas, Eugert Lazaj, kishte “llogari” ligjore-administrative e gjyqësore me policinë shqiptare.
Sipas informacionit zyrtar, biznesmeni jetonte në “Vila nr. 90”, me sipërfaqe 625,4 m2 e vlerë blerje 971 mijë e 97 Euro, që ndodhet në bllokun e tretë të kompleksit “Rolling Hills” në Farkë, ku u gjend pa jetë.
Sipas dosjes, pas shumë vitesh ai është rikthyer për të bërë biznes me resort turistik e për të jetuar përgjithnjë në Shqipëri; por Policia e Shtetit, nuk e ka pajisur me leje të përhershme, por vetëm më leje të përkohëshme “Tipi D/AE- Veprimtari ekonomike”.
Për motive që i dinë vetëm agjencitë e specializuara brenda e jashtë Shqipërisë; Policia e Shtetit, mbështetur në Nenin 35 të ligjit 108/2013, me Urdhër Nr.07/1, datë 17.01.2019, i ka kërkuar viktimës Eugert Lazaj, të largohej nga territori i Shqipërisë.
Në datën 01.04.209, Lazaj i është drejtuar Gjykatës Administrative, me padi dhe kërkesën për sigurim padie, me objekt, anullimin e urdhrit të dëbimit, vërtetuar me Nr. Regjistri Dosje: 31132-01228-86-2019.
Por qysh atëherë e deri ditën kur paditësi u gjet pa jetë, relatorja gjyqësore B.Hasa, nuk caktoi datë për fillimin e procesit të gjykimit.
Ende nuk ka një informacion të plotë, se përse policia i kishte bërë urdhër dëbimi; e përse viktima Eugert Lazaj, nuk e pranonte dëbimin nga Shqipëria, shtetësinë e të cilës e kishte lënë qysh para 16 vitesh.
Burimet thonë, se drejtësia ka nisur komunikimet, me homologët në shtetet ku ai ka jetuar; ndërsa paralelisht, po bën hetim për lidhjet dhe burimin e pasurisë së tij fillestare./Pamfleti
