UEFA ka hedhur sot në Frankfurt shortin e kualifikueseve të “EURO 2024”, ku skuadrat kanë njohur rrugëtimin e tyre drejt finaleve të turneut.
Në këto eliminatore do të marrin pjesë 53 skuadra, ndërsa Gjermania si organizatore e UEFA EURO 2024, kualifikohet automatikisht, dhe për këtë arsye nuk merr pjesë ne short. Bazuar në vendimet e mëparshme të UEFA-s, Rusia është e përjashtuar nga shorti dhe nga këto eliminatore.
53 skuadrat që morën pjesë në shortin e kualifikueseve, janë klasifikuar nëpër 6 vazo në bazë të renditjes së përgjithshme të Ligës së Kombeve 2022-2023, dhe u ndanë në dhjetë grupe kualifikuese, shtatë nga të cilat me pesë skuadra (nga Grupi A deri në Grupin G) dhe tre grupe me nga gjashtë skuadra (nga Grupi H deri në Grupin J).
Kuqezinjtë përfunduan në Grupin E me 5 skuadra, së bashku me Poloninë, Çekinë, Ishujt Faroe dhe Moldavinë duke shmangur superfuqitë e kontinentit.
Shqipëria do të nisë eliminatoret në transfertë me duelin ndaj Polonisë që do të luhet më 27 mars 2023. Kuqezinjtë rikthehen në aksion tre muaj më pas, teksa më 17 qershor do të presin në shtëpi Moldavinë dhe tre ditë më pas sfidojnë në transfertë Ishujt Faroe.
Në shtator Shqipëria do të ketë dy përballje nga më të rëndësishmet ndaj dy rivalëve direkt për betejën e kualifikimit. Më 7 shtator, kombëtarja sfidon Republikën Çeke po në transfertë dhe më 10 shtator pret Poloninë në shtëpi. Më 12 tetor, përfaqësuesja shqiptare do të presë Republikën Çeke në një tjetër duel delikat, për të mbyllur eliminatoret në muajin nëntor me dy ndeshjet, Moldavi-Shqipëri (17 nëntor) dhe Shqipëri – Ishujt Faroe (20 nëntor).
Ndërkaq, duke qenë se Shqipëria është shortuar në një grup me 5 skuadra do të ketë tetë ndeshje zyrtare dhe mund të shfrytëzojë kalendarin e UEFA-s ka për të zhvilluar të paktën dy ndeshje miqësore gjatë vitit të ardhshëm.
Kalendari i Shqipërisë për eliminatoret e “EURO 2024”
27/03/2023 Poloni – Shqipëri
17/06/2023 Shqipëri – Moldavi
20/06/2023 Ishujt Faroe – Shqipëri
07/09/2023 Republika Çeke – Shqipëri
10/09/2023 Shqipëri – Poloni
12/10/2023 Shqipëri – Republika Çeke
17/11/2023 Moldavi – Shqipëri
20/11/2023 Shqipëri – Ishujt Faroe