Cili politikan apo oligark e financon ndalimin e hetimit, arrestimin dhe sekuestrimin e pasurive dhe bizneseve të këtij ish-emigranti me dosje trafiqesh në Itali; ndërkohë që në Policinë e Shtetit dhe në Prokurorinë e Përgjithshme, për të është dhe një dosje me prova audio-video e dorëzuar nga SHISH, regjistruar në mjediset e “PUB-TABU” në Tiranë pronë e këtij trafikanti, përballë të cilit prej 15 vitesh ulet në gjunjë drejtësia
Më 13 korrik 2021, në konteinerët e firmës “Alba Exotic Fruit” të biznesmenit “misterioz” Eduard Dauti, u gjetën 11.6 kg. kokainë; më 23 korrik u gjetën 6.5 kg., ndërsa më 29 korrik u gjetën edhe 7.25 kg. të tjera.
Deri tani, është prangosur Barjon Gumeni nga Progonati, menaxher i firmës “Alba Exotic Fruit”, kushëri i parë i nuses së një drejtuesi të lartë në SHQUP; ndërsa pronari Eduard Dauti vëlla nga nëna me menaxherin, është në Francë, te rezidenca prej nga komandon ngarkesat e bananeve.
Paçka se brenda muajit korrik 2021, i janë kapur 3 ngarkesa kokainë në konteinerët e bananeve, është absurde që firma e trafikantit Eduard Dauti, vazhdon biznesin distributor brenda ish-Kombinatit Tekstil Tiranë, madje duke shtuar dhe 500 m2 objekte, dhënë nga Ministria e Ekonomi-Financave, me qera 1 Euro.
Ky është rasti i tretë brenda muajit korrik, që kapet kokainë në konteinerët e bananeve të sjella në Portin e Durrësit nga Eduard Dauti; por ka dhe raste të tjera kur është kapur e lejuar, ndërsa policia dhe prokuroria e kanë nxjerr “të pastër” biznesmenin.
Në datën 28.09.2019, në konteinerët e kompanisë “Alba Exotic Group”, DEA dhe Policia Greke zbuluan 137 kilogramë kokainë të fshehur brenda bananeve; të cilën po e priste në Durrës, Gentian Malindi, “ortak i punëne të pista” e lidhje familjare me trafikantin Eduart Dauti por edhe me Presidentin Ilir Meta.
Por brenda ditës kur u kap ngarkesa 137 kg., shefat politikë për të cilët “punon” e nxorën të fliste në ekranin e TV-Sandrit me “intervistë speciale”; ku përsëriti 8 herë, se nuk kishte lidhje me kokainën, nuk njihte asnjë politikan në Shqipëri; dhe se mafia i kishte vjedhur çelësa e vula të konteinerit dhe kishte futur kokainën në banane.
Pas kësaj alibie, policia dhe prokuroria pushuan hetimin për Eduard Dautin dhe e lanë të lirë, të trafikonte kokainë brenda bananeve që sillte nga Ekuadori, deri në datat 13, 23 e 29 korrik 2021, kur përsëri DEA Amerikane zbuloi kokainë në konteinerët e firmës “Alba Exotic Fruit”.
Është detyrim i SPAK, të hetojë “rastësinë”, që edhe në këtë rast, trafikanti Eduard Dauti i ka shpëtuar prangosjes, duke ikur nga Shqipëria, 1 ditë pas konstatimit të kokainës dhe 2 ditë para hapjes së kontenierit.
Në marrëveshje me shefat e politikës për të cilët punon, ai la si “bedel prangash”, vëllain e tij nga nëna e menaxher i firmës“Alba Exotic Group”, Barjon Gumeni, për të cilin janë bërë gati letrat për ta liruar, duke e nxjerrë pa asnjë lidhje me kokainën.
Mirëpo, Eduard Dauti i bananeve, një ish-emigrant i prangosur e përzënë nga Italia për trafiqe; nuk është i njohur vetëm për kokainën; por edhe për trafikim në Shqipëri, të makinave luksoze të vjedhura e përdorura në ngjarje kriminale në Itali, gjatë viteve 2000-2007.
Një nga këto makina e markës “Audi”, i është kapur më 7 prill 2007 në Tiranë, duke e përdorur me dokumente pronësie e targa shqiptare false; dhe pas arrestimit i është sekuestruar me Vendim Nr.1365, datë 28.01.2008 të Prokurorisë-Tiranë.
Çuditërisht,, Eduard Duati është liruar nga policia, ndërsa Vendimi i Prokurorisë është lënë në fuqi me Vendim Penal Nr. 895, datë 11.11.2013 të Gjykatës Tiranë; me Vendim Nr. 216, datë 03.03.2014 të Apelit dhe me Vendim Nr. 765, datë 15.05.2014 të Gjykatës së Lartë.
Edhe 3 prova krimi:
- Në datën 21 nëntor 2018, në aksin Librazhd-Prrenjas (Rajcë); policia ka kapur 8 persona që transportonin 570 kg kanabis e 2.5 kg. kokainë, me destinacion Greqinë nëpërmjet Korçës, ku si për “rastësi”, furgoni me targë “AA 356 NA”, rezultoi në pronësi të një biznesmeni po me mbiemrin “Dauti”, kushëri i bosit të drogës në banane.
- Në datën 29.01.2019, kompania “Alba Exotic Group” e Eduart Dautit, u kap në doganën Durrës nga policia dhe AKU; me 41.7 ton banane të kalbura të importuara nga “Costa Rika”, porositur për prodhim lëngjesh nga fabrika “Birra Tirana” me drejtor Luan Bregasin.
- Në Polici e Prokurori, është e bllokuar dhe një dosje me prova audio-video, që ka dorëzuar SHISH me regjistrime në mjediset e “PUB-TABU” në Tiranë, pronë e trafikantit Eduard Duati.
Mirëpo ky trafikant po lihet i lirë, madje qysh prej 13 dhjetorit 2011 me biznes importi bananesh, ushtruar me Certifikatë Sigurie nga Policia, Dogana e Policia Kufitare-Detare.
Është detyrë e SPAK të hetojë e zbulojë, se cilët janë politikani i lartë dhe oligarku që e përdorin dhe e shpëtojnë trafikantin Eduard Dauti./Pamfleti
