Klientët e Edi Ramës, Idajet Ismailaj dhe Gentjan Filaj janë ortakët e oligarkut rus të Vladimir Putinit Oleg Deripaska në Hidrocentralin e Shushicës: A është kjo arsyeja e takimit të Kryeministrit shqiptar me ish zyrtarin e lartë të FBI-së që u arrestua dje?!
Ka pushtuar mediat botërore lajmi për arrestimin e ish-zyrtarit të lartë të kundërzbulimit në FBI Charles McGonigal pasi po ndihmonte oligarkun rus Oleg Deripaska, për ta hequr nga lista e zezë e Shteteve të Bashkuara të Amerikës, si vegël e Vladimir Putinit, kundër interesave të SHBA-ve dhe për ndërhyrje në proceset demokratike të vendeve pro Perëndimit.
Departamenti i Drejtësisë Amerikane thotë se McGonigal i fshehu nga FBI-ja detajet e një udhëtimi që bëri në Shqipëri në vitin 2017, së bashku me një ish-zyrtar të shërbimeve shqiptare të zbulimit, i cili i kishte dhënë 225 mijë dollarë.
Teksa detajet të reja po raportohen mbi raportin mes Oleg Deripaska dhe ish agjentit të FBI-së, çuditërisht askush nuk po flet për ortakët e oligarkut rus në Tiranë dhe biznesin e tij në Shqipëri.
Siç edhe e konfirmon ky dokument, Idajet Ismailaj, Gentjan Filaj dhe njeriu i besuar i Vladimir Putinit (Oleg Deripaska), janë bashkëpronarë në kompaninë Shushica Hydropower, me nipt (L71729019M), kompani që ka ndërtuar kaskadën e hidrocentraleve mbi Lumin Shushicë, për të shitur energji.
Kontrata koncesionare është firmosur nga Etleva Kondi, drejtoresha e Koncesioneve në Ministrinë e Energjisë dhe Industrisë, e arrestuar nga SPAK për aferën e inceneratorëve, pasi ishte korruptuar nga Klodian Zoto për të bërë letrat e inceneratorëve. Pas Kodit fshihet shefi i saj Damian Gjiknuri, i cili vijon t’i shpëtojë drejtësisë.
Kompania Trema Engineering 2 ka 33 % të aksioneve në hidrocentralin e Shushicës. Kompania Trema Engineering është në pronësi të kompanisë STRATBAG AG, e cila rezulton me seli të regjistruar në OrtenburgerstraBe 27, 9800 Spittal/Drau, Austri, me kapital 12 milionë euro. Njeriu i besuar i Vladimir Putinit, Oleg Deripaska, ka 25.9% të aksioneve në kompaninë STRATBAG AG, me të cilën kontrollon 33 % të hidrocentralit të Shushicës.
Kompania ALB – STAR ka 34 % të aksioneve në hidrocentralin e Shushicës. Kjo kompani është në pronësi të kompanisë “FINMAN”. Kompania FIMAN është në pronësi të kompanisë Motus që ka 57 % të aksioneve, Sadik Ismailaj 9%, Jonuz Ismailaj, 19.5% dhe Rajmonda Agalliu 14.5% të aksioneve.
Pronari i kompanisë Motus është oligarku Idajet Ismailaj me 100 % të aksioneve.
Kompania Gr Albania ka 33 % të aksioneve në hidrocentralin e Shushicës. Pronarët kryesorë të kësaj kompanie janë Gentjan Filaj, me 35.77% të aksioneve. Bashkëpronarë të tjerë janë Realdo Mansaku me 34.83% të aksioneve, Ahmet Burak Goktepe, Saimir Boka dhe Henri Aleksi.
Idajet Ismailaj është një oligark dhe përfitues i pasurive publike pranë Edi Ramës, ndërsa Gentjan Filaj është një klient i Ministrisë së Energjetikës dhe Transporteve, ku njihet si një satelit i oligarkut Rrok Gjoka.
SPAK duhet të hetojë nëse Ismailaj dhe Filaj qarkullojnë paratë e Oleg Deripaskës, njeriut të punëve të zeza të Putinit, pjesë e listës së zezë së SHBA-ve, nëse pastrojnë para me bizneset, si i marrin tenderët etj.
Po si e kanë marrë oligarkët shqiptarë dhe rusë hidrocentralin?
Cili është burimi i parave të ndërtimit?
A janë Idajet Ismailaj dhe Gentjan Filaj maska e Oleg Deripaskës së Putinit?
Çfarë bëjnë shërbimet sekrete? Vijon…/Pamfleti
Ky artikull është ekskluziv i Pamfletit, gëzon të drejtën e autorësisë sipas Ligjit Nr. 35/2016, “Për të drejtat e autorit dhe të drejtat e lidhura me to”. Shkrimi mund të ripublikohet nga mediat e tjera vetëm duke cituar Pamfletin dhe në fund të vendoset linku i burimit, në të kundërt çdo shkelës do të mbajë përgjegjësi sipas Nenit 178 të Ligjit Nr/ 35/2016.
