30 tetori 2021 nuk ishte një ditë tjetër për Kun Agueron. Sulmuesi argjentinas pati një aritmi kardiake në mes të ndeshjes kundër Alaveshit dhe ai moment ishte fillimi i një historie, që përfundoi me tërheqjen e tij nga futbolli profesionist.
Kun Aguero foli në “El Hormiguero” të Antena 3, tregoi disa detaje që deri më tani nuk diheshin për atë që i kishte ndodhur muajt e fundit. “Fillova të ndihesha keq në parasezon, me simptoma të çuditshme, por mendova se ishin nga stërvitjet, vapa… Më pas u dëmtova dhe isha pushim për një muaj, por edhe kështu nuk ndihesha rehat”.
“Më vonë fillova të stërvitem me skuadrën dhe në stërvitje nuk ndihesha mirë, derisa një ditë kur mjeku ishte afër, i thashë se ndihesha keq. Më pas m’u mor paksa mendja dhe filloi aritmia. Doktori më kontrolloi, gjithçka shkoi mirë, por javën tjetër ndodhi sërish në stadium”,- shtoi ai.
“Fillova të ndihesha keq dhe doja t’i bërtisja arbitrit që të ndalonte lojën, por zëri nuk më dilte. Fillova të ndihesha i trullosur, kështu që kapa për dore një mbrojtës dhe i kërkova të ndalonte lojën. Më pas filluan marrje mendsh dhe aritmia. Kur pushoi më çuan në spital, ku u shtrova për tre ditë”,- tregon Kun.
