Finlanda dhe Suedia marrin “garancinë” e Shteteve të Bashkuara të Amerikës për t’u bërë pjesë e NATO-s.
Presidenti Amerikan Joe Biden, pas takimit me liderët e Finlandës dhe Suedisë në Shtëpinë e Bardhë, shprehu mbështetjen e plotë për hyrjen e tyre në NATO, duke e cilësuar këtë nismë një moment historik.
“Sot jam krenar për të mikpritur dhe për të ofruar mbështetjen e fortë të Shteteve të Bashkuara të Amerikës lidhur me aplikimin e dy vendeve demokratike dhe tepër të afta për tu bashkuar me aleancën më të madhe e më të fuqishme të mbrojtëse në historinë e botës.
Dy vende të mëdha e të pavarura që ushtrojnë të drejtat e tyre sovrane ashtu si të gjitha shtetet e pavarura gëzojnë të drejtën për të vendosur për sigurinë e tyre.
Sot, nuk ka dyshime: NATO është e rëndësishme, është efektive dhe tani është më e nevojshme se kurrë. Suedia dhe Finlanda janë tashmë ndër partnerët tanë më të ngushtë për një sërë çështjesh”- tha Biden.
“Trupat finlandeze dhe suedeze, kanë shërbyer krah për krah me forcat e SHBA-së dhe NATO-s në Kosovë, në Afganistan dhe në Irak dhe tani më Finlanda e Suedia po punojnë në koordinim me Shtetet e Bashkuara, aleatët dhe partnerët e tjerë për të mbështetur njerëzit e guximshëm të Ukrainës ndërsa mbrojnë lirinë e tyre kundër pushtimit të Rusisë“- tha Biden, duke shtuar se vendet tashmë përmbushin të gjitha kërkesat e NATO-s.
