Flamuri kuq e zi po valëvitet sot edhe në Preshevë.
Kryetari i kësaj komune të populluar me shqiptarë në territorin e Serbisë, Shqiptim Arifi, ka vendosur flamurin në objektin e komunës që e përfaqëson.
Në një fotografi të postuar në rrjetet sociale, Arifi është shprehur krenar në Ditën e Flamurit, të cilin e vlerësoi si më të bukurin në botë.
“Plot krenari e nder, festojmë për ty Shqipëri! Sot, në Preshevë valon flamuri më i bukur në botë. Gëzuar 110 vjet Pavarësi”, ka shkruar Arifi.
Të hënën po kremtohet Festa e Flamurit dhe 110 vjetori i pavarësisë së Shqipërisë.
Për këtë festë, krerët shtetërorë të Kosovës dhe Shqipërisë janë bërë bashkë për herë të parë.
