Kur nuk pastron Razmën, nuk ka asnjë dyshim, që për krejt Shkrelin dhe njësitë e tjera të banuara si Koplik, Gruemirë, Qendër, Kastrat e Kelmend; kryebashkiaku nuk do t’i dijë fare për plehrat, paçka se familjeve dhe bizneseve ua zhvat taksën mujore të pastrimit; por nuk bëhet pastrim, sepse milionat që duhet të shpenzohen për karburant, servise e pjesë këmbimi makinash të mbetjeve, përfundojnë për makinat e kryetarit dhe bizneseve të tij, të shokëve, shefave e sekretareve
Denoncimet që kanë ardhur në “Pamfleti” nga banorë e vizitorë të Razmës, tregojnë mbulimin nga plehrat, të cilat nuk e shqetësojnë kryebashkiakun e Malësisë së Madhe, Tonin Marinaj, por duhet të alarmojnë qeverinë, mbasi kjo zonë është perlë dhe simbol i turizmit malor në qarkun verior.
Banorët por dhe zyrtarë të bashkisë, thonë se plehrat janë skenar i kryebashkiakut Tonin Marinaj e grupit të tij mafioz, për të krijuar emergjencë ekologjike si në Durrës e Vlorë, me qëllim sajimin e ndonjë koncesioni apo zhvatje milionash shtesë.
Gjersa Razma po tejmbushet me plehra, të hedhura në qendër e pikat më të frekentuara të saj; kryeministri Rama duhet të verifikojë zhdukjen e 300 milionë lekë fonde shteti për mbetjet dhe të ardhura nga taksa e pastrimit, që Bashkia Malësi e Madhe mbledh çdo vit
Në letrat që firmos kryebashkiaku Tonin Marinaj, zona turistike e Razmës figuron e pastruar dhe me menazhim perfekt mbetjesh; mirëpo pamjet tregojnë se mbetjet janë prezent, shtohen përditë dhe nuk grumbullohen e nuk pastrohen as të paktën 4 herë në javë siç e ka grafikun bashkia.
Për shkak të statusit që ka Razma, bashkia duhet t’i grumbullojë e t’i pastrojë përditë plehrat në këtë qendër turistike, qoftë dhe duke caktuar 2 punonjës pastrimi e 1 makinë, mbasi Bashkia ka 53 punonjës grumbullimi dhe 7 automjete teknologjike e 1 kamionçinë për evadim mbetjesh.
Por kryebashkiaku Tonin Marinaj nuk e bën, ndërkohë që vetëm sektori i shërbim-pastrimit, ka 1 drejtor, 3 shefa e 9 punonjës administrate brenda zyrave qendrore të bashkisë, të cilët hartojnë evidenca e raporte fiktive, sikur pastrimi në Razëm dhe në 6 zona bëhet rregullisht.
Razma nuk mund të lihet e qelbur me plehra, për shkak se është burim të ardhurash nga turistët, pushuesit dhe vizitorët e çdo stine, të cilët shkojnë jo vetëm për kulinarinë, alpinizmin, ajrin e pastër e natyrën magjepsëse, por dhe për turizëm gjeografik, historik, biologjik, zoologjik etj.
Kontakti me plehrat që kanë mbuluar hyrjen dhe mjediset e akomodimit, shëtitjes, çlodhjes e eksplorimit në Razëm, i zhgënjen turistët, sidomos të huajt; dhe i bënë të mos shkojnë më atje, paçka se ka dhe investime me standarde të larta.
E kur bashkia nuk pastron Razmën, nuk ka asnjë dyshim, që për krejt Shkrelin dhe njësitë e tjera të banuara si Koplik, Gruemirë, Qendër, Kastrat e Kelmend, kryebashkiaku Tonin Marinaj, nuk do t’i dijë fare për plehrat, paçka se familjeve dhe bizneseve ua zhvat taksën mujore të pastrimit.
Saktësojmë se Bashkia Malësi e Madhe ka 497 konteinerë të vendosur në 323 pika, ndërsa në Razëm ka vetëm 2 konteinerë volum 1.1/m3, ndërkohë që çdo ditë dalin 36 m3 mbetje, të cilat grumbullohen 2 herë në javë e për rrjedhojë… plehrat hidhen në rrugë e natyrë.
FAKT/ Dhe në gjatësinë prej 31 kilometër liqen që administron Bashkia Malësi e Madhe, janë 22 zona të mbushura me plehra buzë liqenit, të cilat shtohen si volum e zgjerohen si sipërfaqe.
Mirëpo nuk pastrohen, paçka se milionat shpenzohen, shumica për karburant, servise e pjesë këmbimi makinash të mbetjeve, por që përfundojnë për makinat e kryetarit Tonin Marinaj dhe mjetet e bizneseve të tij, të shokëve, shefave e sekretareshave të bashkisë./Pamfleti
