Ish-kryeministri Sali Berisha ka dalë në një konferencë shtypi për të folur mbi rezultatet e Kuvendit të së shtunës, ku u votuan anëtarët e Këshillit Kombëtar. Edhe pse aty u futen besnikët e tij dhe familjarët, Berisha u shpreh se ai nuk ka manipuluar asnjë votë.
Madje sipas tij, ai është njeri transparent dhe se ai ishte vullneti i delegatëve.
“Praktika e manipulimit të votave merr fund përgjithmonë. Çdo votë është numëruar para kamerave tuaja. Kjo është transparenca më e plotë në një proces votimi. Ky proces është transmetuar LIVE dhe në rrjetet sociale dhe në rrjetet televizive”, tha ai.
Më tej ai u shpreh se armiqtë e votës së lirë janë vetëm Lulzim Basha dhe Edi Rama. Sipas Berishës, në të gjithë procesin e votimit që është bërë që kur ai nisi procesin e zgjedhjeve ka dominuar vetëm transparenca dhe nuk ka pasur asnjë manipulim.
“Ata që rikujtojnë hapat e parë të kësaj lëvizjeje, premtimet më të para gjatë saj do të gjejnë se vota e lirë ishte premtimi më solemn që u bëmë demokratëve shqiptarë në fillim dhe më pas në mënyrë të përsëritur theksova para tyre se ne sollëm në Shqipëri votën e lirë, ndërkohë Edi Rama dhe për ngjashmëri Lulzim Basha e përzunë atë nga Shqipëria. Ne do e rikthejmë atë. Ky ishte zotimi ynë solemn. Mund t’ju them se nga ato ditë gjer sot PD kaloi procese si kurrë ndonjëherë më parë, kuvende gjigante, referendume të papara, kaloi në zgjedhje në çdo seksion, grupseksion, në degë dhe së fundmi në Kuvendin e datës 30 prill ajo bëri zgjedhjet për forumin më të rëndësishëm pas Kuvendit kombëtar që është Këshilli Kombëtar i PD-së. Në të gjithë këtë proces ka pasur dominim absolut vota e lirë”, shtoi ai.
