Ka nisur zyrtarisht procesi i votimit për zgjedhjen e kryetarit të ri të PD, zgjedhje këto që po mbahen nga Rithemelimi i udhëhequr nga Sali Berisha.
Në votime marrin pjesë edhe demokratët që nuk janë në lista, porqë po shkojnë me kartë anëtarësie për të votuar.
Në tre bashkitë e rrethit të Vlorës kanë të drejtë vote më konkretisht në bashkinë Vlorë rreth 1400 antarë, ku procesi i votimit po zhvillohet në Pallatin e Kulturës “Labëria”.
Në bashkinë Selenicë me të drejtë vote janë 906 anëtarë me listat e vjetra ndërsa aktiv rreth 600 të cilët kanë të drejtën e votës në procesin e votimit sot.
Procesi i votimit po zhvillohet edhe në fshatin Peshkëpi të Bashkisë Selenicë. Në bashkinë Himarë me të drejtë vote janë 413 antarë dhe procesi i votimit po zhvillohet në selinë qendrore të PD në këtë degë. Procesi i votimit ka nisur i qetë dhe pa probleme teksa në momentet e para të tij shihet një interesim i konsiderueshëm i qytetarve për të votuar.
Në Kukës janë hapur tre qendrat e votimit për zgjedhjen e kreut të ri të PD, dy në qytet ku do të votojnë anëtaret e qytetit, të grup seksioneve të Grykës së Vanave, Topojan, Shishtavec, Zapod, Bicaj, Malzi, Terthore, Shtiqen, Surroj, Arren, Kolsh.
Qendra tjetër është në fshatin Bushtrisë, ku do të votojnë grup seksionet Bushtrice Ujmisht,Gryke- Caje dhe Kalis. Edhe anëtarët që nuk janë në listë do të marrin pjesë në zgjedhje duke votuar me kartë anëtarësie të shoqëruar me letërnjoftim.
Ndërsa Pogradeci ka 2 qendra votimi në zyrën e degës së qytetit dhe në Proptisht, numri i listës është 1400 ndërsa aktivë janë 700.
Një qendër votimi është edhe në zyrën e listës në Devoll, ku numri i listës është me 2400 anëtarë ndërsa aktivë janë rreth 1000.
Në Maliq ka dy qendra votimi, një në zyrën e degës dhe tjetra në ish komunën Pojan. Numri i listës është me 2200 anëtarë ndërsa aktivë janë 1000.
Erseka ka 2 qendra votimi një në zyrën e degës në Ersekë dhe tjetra në një ish farmaci në qëndër Leskovik. Numri i listës është 700 anëtarë ndërsa aktivë janë rreth 400.
Procesi i votimit ka nisur edhe në Lushnje e Divjakë.
Edhe në Sarandë procesi ka nisur në orën 08.00 të mëngjesit. Deri në orën 08.40 kanë votuar vetëm 20 anëtarë. Procesi i votimit bëhet tek selia e PD, ku do të votojnë demokratë të Sarandës, Konispolit dhe Finiqit. Sakaq vëzhgues në Sarandë ka vetëm kandidati Sali Berisha.
