Qeveria spanjolle po përgatitet të bëjë një kthesë historike në pozicionin e Spanjës ndaj Kosovës, me një deklaratë që do të përfshijë njohjen e parë de facto të Kosovës që nga shpallja e pavarësisë.
Kështu shkruan gazeta spanjolle “The Objective”, teksa shpjegon se sipas burimeve të gazetës, kjo mund të vijë përmes një zyre tregtare dhe kulturore në Prishtinë, megjithëse Zyra për Informim Diplomatik deklaroi se këto opsione nuk janë në tavolinën e diskutimit për momentin dhe se po shqyrtohen çështje të tjera.
Lidhur me njohjen së Kosovës nga Spanja dje foli edhe Sekretari i Shtetit për BE-në, Juan Gonzales-Barba, i cili e bëri të qartë se Spanja nuk do ta njohë diplomatikisht Kosovën derisa të mos ketë marrëveshje mes Prishtinës dhe Beogradit.
Por numri tre i diplomacisë spanjolle tha se Spanja dëshiron që të jetë më e përfshirë në rajon dhe një strategji e tillë do të ishte pa efekt nëse vazhdohet me injorimin total të Kosovës.
Gonzalez-Barba tha se vendimi i Spanjës “do të merret së shpejti dhe do të bëhet publik”, duke nënkuptuar se një hap diplomatik është i pashmangshëm.
“Ne duam që vendimi të kuptohet nga Serbia, partneri ynë kryesor në Ballkanin Perëndimor, “shtoi ai, duke ditur se sa e ndjeshme është kjo çështje në Beograd.
“Ne duam të kontribuojmë në përpjekjet e të gjithë vendeve anëtare dhe të dërguarit të Përfaqësuesit të Lartë – ish-Ministrit të Jashtëm sllovak, Miroslav Lajçak – për të arritur marrëveshje midis Beogradit dhe Prishtinës dhe shpresojmë se përpjekjet tona do të njihen dhe vlerësohen nga vendet e Ballkanit.“, përfundoi ai./ Koha
