Ndërkohë që vala e zemërimit në Iran për vdekjen e 22-vjeçares Mahsa Amini po përhapet, presidenti i Iranit, Ebrahim Raisi, po kujdeset që me qëndrimin e tij t’i hedhë më shumë benzinë zjarrit.
Gazetarja e njohur e CNN, Christiane Amanpour anuloi një intervistë me presidentin iranian Ebrahim Raisi pasi ai kërkoi që ajo të mbante një shami për takimin e tyre në Nju Jork.
Christiane Amanpour kishte organizuar një intervistë me presidentin iranian për ta pyetur për vdekjen e gruas 22-vjeçare dhe protestat që kanë shpërthyer në vend.
Në fakt, siç vëren gazetarja britaniko-iraniane, kjo do të ishte intervista e parë e presidentit iranian në tokën amerikane.
Megjithatë, intervista nuk u zhvillua kurrë pasi presidenti Raisi sugjeroi që Amanpour të mbante shami sepse janë muajt e shenjtë të Muharremit dhe Safarit, gjë që gazetarja e refuzoi me mirësjellje.
“Pas javësh përgatitjeje dhe orëve të gjata të vendosjes së pajisjeve të përkthimit, dritave dhe kamerave, ne ishim gati. Por presidenti Raisi nuk u paraqit. Dyzet minuta më vonë erdhi një asistent. Siç më tha, presidenti më sugjeroi të mbaj shami, sepse janë muajt e shenjtë të Muharremit dhe Safarit”, tha fillimisht Christiane Amanpour.
“Jemi në Nju Jork, ku nuk ka asnjë ligj apo traditë për shamitë. Theksova se asnjë president iranian nuk e kishte kërkuar më parë këtë kur po i intervistoja jashtë Iranit,” shtoi ajo.
“Asistenti e bëri të qartë se intervista nuk do të bëhej nëse nuk mbaja shami. Ai foli për një ‘çështje respekti’ dhe foli për ‘situatën në Iran’ – duke iu referuar protestave që po përfshijnë vendin”, vazhdoi ajo dhe shtoi se “përsëri i thashë se nuk mund të pajtohesha me këtë kërkesë të paprecedentë dhe të papritur”.
“Dhe kështu u larguam. Intervista nuk u zhvillua. Në një kohë kur protestat po vazhdojnë dhe njerëzit po humbasin jetën, do të ishte një moment i rëndësishëm për të biseduar me Presidentin Raisi”, përfundoi ajo.
Mahsa Amini, 22 vjeç, ra në koma javën e kaluar, disa orë pasi “policia e moralit” e arrestoi.
Oficerët thuhet se kanë goditur në kokë zonjën Amini me shkop dhe e kanë goditur kokën e saj në një nga automjetet e tyre. Policia ka thënë se nuk ka prova për ndonjë keqtrajtim dhe se ajo pësoi “insuficiencë të papritur të zemrës”.
Protestat, tashmë në ditën e tyre të shtatë, janë përhapur në 80 qytete dhe qyteza të tjera në Republikën Islamike. Të paktën 17 persona janë vrarë.