Avokati Kujtim Cakrani deklaron se problematika e pronave ka nisur që në vitin 1993, kur u bë ligji i pronave.
Përmes një interviste për emisionin “Review” në Euronews Albania, avokati shprehet se në arkivat e shtetit janë futur edhe dokumente të falsifikuara në mënyrë që vidhen prona.
“Problematika e pronave ka nisur në 1993 kur u bë ligji i pronave. Në atë kohë nisi falsifikimi. Konflikti ka plasur mes viteve 2000-2005 pasi janë grisur regjistra, janë bërë pjesë të arkivave dokumente të falsifikuara. Të siguroj që janë futur edhe në arkivat e shtetit dokumente të falsifikuara të bëra nëpër bodrume për të vjedhur prona”- tha Cakrani.
Ndërkohë, gazetari Eni Ferhati u shpreh se ka konflikt gjyqësor për një pjesë të konsiderueshme të vijës bregdetare në vendin tonë. I ndalur tek përplasjet për shkak të pronësisë në Gjirin e Lalzit, Ferhati u shpreh se ky është vendi ku shteti ka bërë një sy qorr.
Sipas Ferhatit, në këtë zonë dhjetëra persona janë në garë se kush do e marrë certefikatën e pronësisë.
“Ka ende pjesë të konsiderueshme vijë bregdetare që ka konflikt gjyqësor, dhe kur ka një konflikt gjyqësor ka dhe konflikt mes njerëzve që janë për këto prona. Historia e Gjirit të Lalzit është një histori e paralajmëruar në fakt. Është një histori që shteti ka bërë një sy qorr ose ka qenë i interesuar që të ruaj krahun e individëve me pushtet. Në Lalz ka ende toka që nuk kanë një zot dhe dhjetëra persona mund të jenë në garë se kushdo të jetë i pari që të marrë certefikatën e pronësisë”– u shpreh Ferhati.
