Shkruar nga Pamfleti
Gjukanoviç mesazh nga Brukseli: Formimi i qeverisë së pakicës, opsioni më realist!
Presidenti malazez, Milo Gjukanoviç mendon se opsioni më realist për Malin e Zi, është që të formohet një qeveri e pakicës. Sipas Gjukanoviç, një qeveri teknike do të ishte mundësia e fundit – vetëm nëse dështojnë të gjitha përpjekjet për të zgjidhur krizën politike nëpër të cilën po kalon shteti.
“Nëse nuk ka marrëveshje për qeveri të pakicës, me mund të rikthejmë disa prej zgjidhjeve të mundshme: e para është organizimi i zgjedhjeve të parakohshme parlamentare, dhe nëse nuk ka zgjidhje, atëherë ne definitivisht do të hynim në skenarin e formimit të një qeverie kalimtare teknike. Kjo qeveri do të kishte vetëm një detyrë – të përditësojë legjislacionin për zgjedhjet sa më shpejt që të jetë e mundur, që të mbahen zgjedhjet e parakohshme parlamentare”, tha Gjukanoviç për mediet nga Brukseli.
Idenë e qeverisë së pakicës po e shtyn përpara kreu i Lëvizjes Qytetare URA, Dritan Abazoviç, ndërkaq krijimin e një qeverie teknike po e kërkon partia pro-serbe, Fronti Demokratik. Megjithatë, presidenti i Malit të Zi beson se në çdo variant, qeveria e ardhshme do të jetë qeveri e vazhdimit të kursit politik dhe strategjik që shteti ka pasur në 25 vjetët e fundit.
“As ky eksperiment njëvjeçar nuk vuri në pikëpyetje orientimin strategjik të Malit të Zi”, tha Gjukanoviç.
Kujtojmë se, Gjukanoviç e konsideroi si eksperiment qeverinë e ish-kryeministrit, Zdravko Krivokapiç, i cili u shkarkua nga Kuvendi në fillim të shkurtit, rreth një vit e gjysmë pas fitores në zgjedhjet e 30 gushtit të vitit 2020.
