Gjykata e Vlorës caktoi sot masën e sigurisë “arrest me burg” për komisarin Arjan Tase, i cili hyri me skaf në zonën e plazhit të Potamit dhe përplasi për vdekje 7-vjeçaren, Jonada Avdia.
Gjatë seancës së sotme gjyqësore, ish-komisari nuk ka kundërshtuar masën e arrestit dhe i ka kërkuar falje familjes së të miturës dhe policisë për ngjarjen tragjike.
Kujtojmë se, Avdia humbi jetën 3 ditë më parë. Ajo u përplas fillimisht nga pjesa ballore e gomones dhe më pas trupi i saj është prerë nga helikat duke ndërruar jetë në vend. Fëmija, me origjinë nga Tropoja jetonte jashtë shtetit me familjen e saj në Angli, por ishte kthyer në atdhe për pushime. Ngjarja e rëndë ka sjellë reagime të shumta në vend, ndërsa një protestë u mbajt ditën e djeshme ku kërkohej dorëheqja e ministrit të Brendshëm Bledi Çuçi dhe ministres së Turizmit, Mirela Kumbaro.
