Presidenti Ilir Meta ka paralajmëruar dërgimin e çështjes së “30 Qershorit” në Gjykatat Europiane.
Për “Çim Peka Live”, Meta deklaroi se nuk ka ende një vendin të zbardhur sa i përket çështjes së zgjedhjeve vendore të 30 qershorit 2019.
“Për zgjedhjet vendore kam aktualisht vetëm një qendrim zyrtar, raportin e OSBE/ODIHR. Vendimin e Gjykatës Kushtetuese të zbardhur unë nuk e kam dhe nuk e ka askush. Kur të dale vendimi atëherë unë do shpreh qendrimin tim. Por mund t’ju them që mbi Gjykatën Kushtetuese ka Gjykata të tjera europiane.”-tha Meta.
Kujtojmë se, Gjykata Kushtetuese i dha fund diskutimit duke legjitimuar zgjedhjet lokale të 30 Qershorit 2019, të cilat u bojkotuan nga opozita.
Kushtetuesja rrëzoi kërkesë-padinë e Shoqatës së Bashkive të Shqipërisë, e drejtuar nga Ademi, për shpalljen të pavlefshëm të “30 Qershorit” dhe mbajtjen sërish të zgjedhjeve lokale. Çka do të thotë se zgjedhjet, pavarësisht se opozita- PD dhe LSI- munguan, janë të ligjshme dhe se nuk do të ketë proces të parakohshëm.
