Rusia ka testuar një tjetër raketë hipersonike, duke lëshuar në këtë mënyrë mesazhe kërcënimi ndaj Perëndimit.
Ministria e Mbrojtjes bëri të ditur se ajo u qëllua nga ujërat e detit Barents drejt një shënjestre në Detin e Bardhë, në bregun veri perëndimor të Rusisë.
Sipas deklaratës, kjo ishte pjesë e një testi të gjerë të armëve të reja, ndërsa nuk dihet nëse këto janë parapërgatitje për t’i përdorur në luftën e Moskës në Ukrainë. Pamjet filmike të testit të raketës “Zirkon” janë publikuar nga ministria teksa qëllohet nga një fregatë e klasit të lartë në det.
Arma e fuqishme ecën me një shpejtësi marramendëse, deri në 3 kilometra në 1 sekondë dhe mund të godasë Londrën brenda 5 minutave.
Kjo armë ka qenë në zhvillim prej disa vjetësh, dhe ekzistenca e saj u konfirmua në shkurtin e vitit 2019 nga presidenti rus Vladimir Putin.
Ai deklaroi se kjo raketë është e aftë të shkatërrojë si objektivat në det ashtu në tokë, brenda një distance prej 1.000 km. Dhe në provën e mëparshme, thuhet se fluturimi i Zirkon zgjati mbi 500 kilometra. Në prillin e vitit 2017, u raportua se raketa kishte arritur një shpejtësi prej 9.800 km/h, ose 2.722.3 m/s gjatë një fluturimi provë.
Në dhjetorin e vitit të shkuar, Vladimir Putin, njoftoi se po zhvillohej raketa Zirkon, që do të përdoret kryesisht kundër objektivave tokësore.
Raketat supersonike mund të arrijnë shpejtësi deri pesë herë më të larta se shpejtësia e zërit dhe mund të manovrohen gjatë fluturimit. Ato mund të ndryshojnë lartësinë e tyre në atmosferë dhe të lëvizin në trajektore të paparashikueshme. Këto raketa janë të vështira për t’u dalluar nga sistemet konvencionale të mbrojtjes kundërajrore dhe vështirë se mund të përgjohen, pasi objektivi i tyre dihet vetëm në momentin e fundit.
