Kosovë- 120 punëtorë kanë mbetur të bllokuar përkohësisht në minierën e Trepçës, pasi një rrufe goditi rreth orës 15:00 rrjetin e energjisë elektrike.
Lajmi u konfirmua për mediet kosovare nga kreu i Sinidikatës së Minatorëve, Gani Osmani. Sipas Osmanit, rryma u ndërpre si pasojë e shkarkesës elektrike në rrjetin e energjisë, duke lënë të ngujuar minatorët për 15 minuta. Me të ardhur energjia sërish, punonjësit e bllokuar në horizontin 11, 10 dhe 9 kanë dalë jashtë.
Për ngjarjen ka reaguar edhe drejtuesi i Trepçes, Enis Abdurrahmani. Për mediet, Abdurrahmani theksoi se me t’u verifikuar problemi, janë bërë riparimet e nevojshme për të nxjerrë minatorët nga miniera.
“Është rregulluar defekti i shkaktuar si pasojë e goditjes së rrufesë. 90 përqind e minatorëve kanë dalë dhe të tjerët janë duke dalë. 10 të tjerë tash po hyjnë në ndërrimin e dytë me punu”- tha Abdurrahmani, duke konfirmuar se gjendja e punëtorëve është e mirë.
“Rrufeja i ka shkatërru disa izolatorë në rrjetin energjetik që është 85-shi, pra që është rrjeti i përgjithshëm i rrymës. Në bashkëpunim me KESCO-n me ekipe jemi duke e bërë sanimin e problemit. Gjendja e tyre është e mirë. Brenda 30 minutave e bëjmë sanimin e rrjetit dhe i nxjerrim përmes ashensorit. Ata kanë mbetë në horizontin e 11-të, 10-të dhe 9-të”, ka thënë Abdurrahmani.
