Dy policët e arrestuar dje, të akuzuar se grabisin të rinjtë në zonën e Liqenit artificial të Tiranës, kanë dëshmuar ditën e sotme dhe njëri prej tyre ka habitur me deklaratën e tij.
“Qytetarët i grabisja pasi kisha një kredi për të larë”, mësohet të ketë thënë polici bashkiak i Tiranës, 39 vjeçari, Sajmir Muzikanti, pas akuzave se bashkë me oficerin e rendit të komisariatit nr.1, Serxhio Cani 22 vjeç, u merrnin para me forcë qytetarëve të moshave të ndryshme.
Gjithashtu polici bashkiak ka pranuar gjatë dëshmisë së tij se i kryente grabitjet gjatë kohës që ishte në krye të detyrës.
“Sa herë që isha turni i tretë në punë merrja në telefon Serxhion dhe i thoja hajde dalim nga Liqeni. Për shkak të kredisë që kam detyrohesha t’u merrja paratë me zor qytetarëve. Këtë gjë e kam bërë në bashkëpunim me Serxhion”, ka dëshmuar ai.
Nga ana tjetër Serxhio Cani, me detyrë polic patrulle ka mohuar se është përfshirë në grabitje. Por, provat e mbledhura nga kolegët e tij dhe oficerë të Agjensisë së Mbikqyrjes Policore hedhin poshtë qëndrimet e 22 vjeçarit.
Puna për identifikimin e tyre u organizua pas denoncimit të një qytetari i cili deklaroi se një polic bashkie i kishte marrë disa herë para me dhunë atij dhe personave të tjerë. Dy policët, vepronin kryesisht në zonën e Liqenit Artificial sapo binte errësira.