Nëse SPAK do të ketë vullnet për të hetuar, disa kryebashkiakë dhe drejtorë të Edi Ramës duhet të përfundojnë në burg si Fatos Tushe, pasi kanë ndarë mbi 20 milionë USD nga paratë publike me dy çerra anonimë nga Bishqethmi i Lushnjes, me anë të tenderave të paracaktuar, klientelistë dhe dukshëm korruptivë. Bëhet fjalë për dy çunakët Aldi dhe Anea Llazi, të cilët kanë trashëguar kompaninë e ndërtimit Llazo sh.p.k, e cila mashtron me taksat, pasi paguan punëtorët me 2-3 mijë lekë në muaj, gati sa në kohën e kooperativave.
Aldi Llazi mban pozicionin e administratorit, ndërsa vëllai i tij Anea Llazi mban pozicionin e drejtuesit të makinave të rënda, pra shofer. Dy çerrat i marrin tenderat me vlerë më të lartë me letra false dhe klientelizëm, shëtisin nëpër Evropë, ndërsa punëtorë i paguajnë me një pagë qesharake, duke operuar me dy palë bordero, duke falsifikuar dokumente dhe u përfshirë në një krim masiv ekonomik.
Gjithsesi problemi duhet kërkuar pikësëpari tek pushtetarët publikë që ndajnë paratë publike me Llazot e Bishqethmit. Në fund të fundit, çerrat kanë gjetur fijet dhe një dorë të fortë mbështetëse në Tiranë, dhe kështu po kanalizojnë paratë e taksapaguesve shqiptarë në llogaritë e tyre, deri kur të goditen nga drejtësia.
Në mënyrë të dyshimtë, Llazot kanë marrë rreth 4 milionë USD tendera nga Fondi Shqiptar i Zhvillimit me në krye hajdutin e madh dhe të sprovuar, Dritan Agollin, i cili i ka vendosur vetes një rrogë prej 7 mijë USD në muaj. Mbetet për t’u zbuluar se si Agolli e ka marrë llokmën e tij, apo tenderat janë qoka për një zyrtar tjetër të lartë në Tiranë, i cili fshihet pas Llazove.
Mbi 17 tendera me vlerë rreth 4.6 milionë USD, kompania ‘Llazo shpk’ i ka marrë në mënyrë të dyshimtë nga Bashkia e Lushnjes dhe ujësjellësi i Lushnjes. Jo rastësisht, kryetari i Bashkisë së Lushnjes, Fatos Tushe, i cili ka diktuar tenderat për çerrat e Bishqethmit, është futur në burg nga SPAK për një aferë tjetër korruptive, ndërsa drejtori i ujësjellësit Erjet Dhima, i ka ditët e numëruara, pasi ka disa dosje vjedhjesh në SPAK.
Katër tendera me vlerë rreth 2.4 milionë USD, Llazot e Bishqethmit i kanë marrë nga Bashkia e Tiranës, e cila drejtohet nga Lali Eri, simboli i klientelizmit, korrupsionit, mashtrimit dhe pastrimit të parave në Shqipëri. Fakti që çunakët kanë marrë shuma kaq të mëdha nga Bashkia e Tiranës dhe FSHZH, tregon për një ‘ujk të vjetër korrupsioni’ që fshihet pas tyre, për të cilin do të flasim në vijim.
Mbi 5 milionë USD tendera Llazot i kanë marrë nga Bashkia e Durrësit, e cila drejtohet në letra nga Emiriana Sako.
Pesë tendera Llazot e Lushnjes i kanë marrë në Bashkinë e Fierit, e cila drejtohet nga Armando Subashi, i denoncuar nga deputeti Petro Koçi si kapur nga grupet kriminale të Fierit. Llazot kanë marrë tendera edhe sulltanesha e Roskovecit, Majlinda Bufi, e njohur jo vetëm për pasurinë e dyshimtë, por edhe për lidhjet me segmentet e drogës.
Çerrat e Bishqethmit i kanë shtrirë fijet edhe në bashkitë Elbasan, Berat, Himarë, Gramsh, Konispol, Divjakë etj., duke marrë tendera të dyshimtë, me një diferencë qesharake mes fondit limit dhe ofertës fituese, me paracaktim, letra false etj. Po vëzhgojmë procedurat dhe tenderat e tjerë që po planifikohen për Llazot e Bishqethmit në vijim, si dhe skemat e ndarjes së parave publike. Në vijim detaje për bashkëpuntorët e Llazove, të skeduar si hajdutë të regjur të fondeve publike./Pamfleti
