Hakerat iranianë kanë tronditur politikën shqiptare. Sot ata kanë publikuar të dhëna të dyshuara nga sistemi “MEMEX”, i cili mban listën e të gjithë qytetarëve të hetuar apo të dyshuar nga policia.
Vetë policia reagoi dhe shprehet se ky sistem nuk është prekur, por nëse shihet lista, aty janë emrat e shumë personave dhe në dosje shkruhet që janë të dyshuar nga policia. Për secilin prej tyre jepen të dhënat e gjeneraliteteve, si emri, mbiemri, datëlindja, të dhënat e ID, etj.
Por ajo që bie në sy është se në listën e të dyshuarve të policisë ka dhe deputetë. Emri i parë që doli ishte i deputetes socialiste dhe ministres për Marrëdhëniet me Parlamentin, Elisa Spiropali. Por nga të dhënat e fundit, figurojnë në këtë databazë edhe ministri i Mbrojtjes Niko Peleshi dhe deputetja Mimi Kodheli. Edhe për ta jepen vetëm gjeneralitetet.
Po ashtu në listë është dhe deputeti i LSI (Partia e Lirisë), Agron Çela. Dyshimet janë se në këtë listë ka dhe shumë emra të tjerë. Ndërkohë sistemi nuk ka të dhëna se përse ata mund të jenë hetuar apo dyshuar. Vetë Spiropali ka reaguar dhe shprehet se nuk është lista e MEMEX, ndërsa vetë policia po shtu e mohon. Ndërkohë nuk ka një sqarim se çfarë është kjo listë.
Bëhet fjalë për 1.7 giga byte informacion, i cili sot u shpërnda nga hakerët përmes rrjetit “Telegram”. Kur u sulmua sistemi TIMS, u zbulua që hakerët sulmuan dhe sistemet MEMEX dhe ADMAS, ku mbahen të dhënat e personave në kërkim, të hetuar apo të dyshuar.
Sistemi ADAM ka të gjitha ngarkesat penale të qytetarëve të arrestuar, ndaluar, apo dyshuar për një ngjarje. Ndërkaq, sistemi MEMEX ka informacione sekrete mbi ngjarje dhe sistemi i Menaxhimit Policor të çështjeve, ka gjitha veprimet e kryera nga policia. /Pamfleti
