Nuk ndalet edhe pas 21 vitesh hakmarrja gjakatare për vrasjen e kriminelit famëkeq serb, Zhelko Razhnjatoviç, i mbiquajturi Arkan.
Siç njofton gazeta serbe “Glas”, është vrarë në Beograd Zoran Uskokoviç, pikërisht kur po hynte në shtëpinë e nënës së tij në kryeqytetin serb.
Nëna e Zoranit thotë se është një hakmarrje e pastër. Zoran Uskokoviç (22 vjeç), është djali i një emri të njohur të nëntokës serbe me të njëjtin emër.
Sipas të dhënave të para të policisë, vrasësi i tij ishte maskuar si një plak.
Babai i tij, Zoran Uskokoviç, i vjetri, i thirrur me nofkën Skole, u përmend si organizatori vrasjes së Arkanit. Pas vrasjes së tij, u likujduan me radhë: Branislav Lainoviç i thirrur Dugi, Zoran Davidoviç me nofkën Çanda, Mirko Tomiç, që thirrej si boshnjaku, Radoslav Trlajiç që thirrej Bata Tralaja.
Dy ditë para se të vritej, një eksploziv i fuqishëm ishte vendosur në hyrje të ndërtesës së tij. Një shpërthim i fortë bëri jehonë një orë pas mesnatës dhe dëmtoi ndjeshëm një ndërtesë shumëkatëshe në rrugën Vinogradski Venac në lagjen Cerak, ku Skole jetonte me gruan dhe dy fëmijët e tij. Fuqia e shpërthimit shkatërroi gjithashtu dritaret në ndërtesat përreth. Për fat të mirë, askush nuk u lëndua.
Skole u vra më 27 prill 2000, në një përleshje zjarri në Vidikovac. Me të vdiq edhe truproja i tij, oficeri i policisë Milos Stevanoviç. Likuidimi u parapri nga një ndjekje makine, dhe u qëllua nga një Audi në lëvizje. Një shi plumbash u hodh nga kallashnikovët dhe pistoletat dhe është një mrekulli e vërtetë që askush nga kalimtarët nuk u vra.
Ndërkaq, për vrasjen e djeshme, e ëma e Zoranit të ri dyshon se djali i saj ishte viktimë e hakmarrjes së vjetër për likujdimin e Arkanit.
“Unë mendoj se djali im u vra për hakmarrje. Zoran ishte një fëmijë i mirë” tha nëna e të riut. Halla e Zoranit tha për “Clas” se nipi i saj ishte një djalë shumë i edukuar.
“Zoran ishte paksa inatçor, por nuk ishte kriminel. Ai nuk kishte probleme me drogën. Të gjitha historitë rreth tij që ka shkruar media nuk janë të vërteta. Ai po ngiste një Audi A4 të vitit 2007, e cila nuk është i shtrenjtë, e bleu atë për 3.500 euro. Kjo vrasje ishte vendosur që herët”, tha halla e tij, e cila shtoi: “Unë jam i sigurt se ai nuk u inatos me askënd. Kjo është hakmarrje për vrasjen e Arkanit, nuk ka asnjë arsye tjetër.”
Fqinjët e tyre thonë se ata e njihnin nënën e Zoranit të vrarë. Ne kemi pirë kafe me të gjatë gjithë kohës, ajo është një grua e mirë. Policia erdhi tek ne dhe na tregoi disa fotografi të burrave dhe na pyeti nëse i njihnim. Sidoqoftë, ne nuk njohëm asnjë prej tyre – thotë fqinji.
Vrasësi u takua me djalin e Skolet në një vendkalim të ngushtë midis ndërtesave dhe më pas nxori një armë nga palltoja dhe e qëlloi Zoran drejt e në kokë. Vrasësi pastaj u përkul, mori diçka dhe më pas iku.
Nga hetimi u konkludua se djali i Skolet ishte ndjekur dhe se ai u vra në një atentat klasik. Vrasësi i dinte mirë lëvizjet e tij dhe kur Zorani u drejtua drejt ndërtesës ku jetojnë nëna dhe njerku i tij, e ku ai e qëlloi.
Trupi i Uskokoviçit të pafat u gjet nga punëtorët e furrës rreth orës pesë e gjysmë, në rrugën Borska në Miljakovac në numrin 51. Uskokoviç ishte dy vjeç kur babai i tij u vra, më 27 prill 2000, në një përleshje zjarri në Vidikovac./Pamfleti
