Në agjenden e takimeve te Përfaqësuesit Special të Bashkimit Evropian për dialogun Kosovë-Serbi, Miroslav Lajčak, ishte edhe takimi me kryetarin e Aleancës për Ardhmërinë e Kosovës (AAK) Ramush Haradinaj.
Njoftimin për takimin e bëri të ditur Haradinaj përmes një postimi në Facebook.
“Në takim me Përfaqësuesin Special të BE-së për dialogun Kosovë – Serbi, z. Miroslav Lajčak, ripërsërita qëndrimet tona për dialogun, domosdoshmërinë e rolit strategjik të Shteteve të Bashkuara të Amerikës dhe përkushtimin tonë për një Marrëveshje Gjithëpërfshirëse ligjërisht të obligueshme, e cila ka epilog njohjen reciproke mes dy vendeve”, ka shkruar Haradinaj.
Ai ka falenderuar Lajčakun për angazhimin e tij dhe të BE-së në procesin e dialogut. “Gjithashtu z.Lajčak e falënderova për angazhimin e tij dhe të Bashkimit Evropian në këtë proces të rëndësishëm për Kosovën”, ka përfunduar Haradinaj.
