Ministri i Drejtësisë Ulsi Manja ka zhvilluar sot një takim me kryetaren e KLGJ, Naureda Llagami dhe anëtarin e këtij këshilli, Maksim Qoku.
Përmes një reagimi në rrjetet sociale, Manja shprehet se palët kanë diskutuar për propozim të përbashkët të hartës së re Gjyqësore, i cili do të konsultohet më pas edhe me institucionet e tjera të drejtësisë, Këshillin e Lartë të Prokurorisë, Prokurorinë e Përgjithshme si dhe Ministrinë e Financave.
Sipas Manjës, harta e re duhet të adresojë garantimin e aksesit në drejtësi, uljen e kostove dhe rritjen e cilësisë.
“Me Kryetaren dhe Zv/Kryetarin e KLGJ-së, znj. Naureda Llagami dhe z. Maksim Qoku, na ka bërë bashkë diskutimi mbi draftin e Hartës së Re Gjyqësore.
Diskutimet konstruktive mes Ministrisë së Drejtësisë dhe KLGJ-së për të dakordësuar një propozim të përbashkët të Hartës së Re Gjyqësore, e më pas konsultimin me Këshillin e Lartë të Prokurorisë, Prokurorinë e Përgjithshme, Ministrinë e Financave dhe Ekonomisë dhe grupet e interesit në përputhje me kriteret e përcaktuara në ligjin nr. 98/2016 janë të hapura për të adresuar çdo merak që ka të bëjë me:
- a) garantimin e aksesit në drejtësi, që lidhet me afërsinë e individit në marrjen e shërbimeve gjyqësore;
- b) uljen e kostove, me qëllim përdorimin me efektshmëri të burimeve publike;
- c) rritjen e cilësisë dhe përshtatshmërisë së shërbimeve të ofruara.”- shkruan Ulsi Manja.
