Ndryshe nga situata e post tërmetit të 26 nëntorit të vitit të kaluar, në këtë katastrofë të radhës për shqiptarët, po vihet re një zhvillim paksa i çuditshëm.
Prej gati 20 ditësh nga shpërthimi i emergjencës së koronavirusit, një dramë që përveç rrezikut të jetës, kërcënon edhe të ardhmen e mirëqenies së përbashkët, ata, miliarderët, kapitalistët e mëdhenj të vendit, filantropë e manjatë, janë strukur dhe nuk po e kryejnë as 1% detyrën civile e humane për t’ju gjendur vendit në këtë gjendje të vështirë.
Shumë e pashpjegueshme kjo heshtje që duket se ndikon natyrisht në rëndimin e situatës, pasi ajo pjesë që natyrisht paguan kontribute të mëdha ngaqë kryen transaksione financiare shumë milionëshe, është edhe më e përkëdhelura nga sistemi, pikërisht prej statusit që kapitalizmi u jep protagonistëve të tij.
Në të gjitha vendet e botës që natyrisht janë në gjendje të jashtëzakonshme si pasojë e pandemisë që merr çdo orë frikshëm jetë të shumta njerëzish, në radhën e parë të solidaritetit ndodhen manjatët e mëdhenj, milionerët e miliarderët që kanë hapur thesin e depozitave të tyre për të kontribuar dhe për të zbutur sadopak situatën.
Në Itali, e nisën 50 restorantet më të mira e luksoze të Milanos që grumbulluan shumën e parë për të blerë pajisjet mbrojtëse për mjekët e Lombardisë.
Thjeshtë çuan lekët e nuk thanë asnjë fjalë, por ishte Guvernatori Fontana që i falënderoi publikisht ndërsa qante live si pasojë e dëshpërimit ngaqë s’po vinin maskat e veshjet e posaçme nga Europa. Bëhet fjalë për miliona euro.
Më pas nisën me radhë. Silvio Berlusconi, ish-kryeministri dhe pasaniku i madh italian, dha menjëherë 10 milionë euro me çek bankar që i dërgoi me mazhordomin e tij tek arka e Unita Sanita Locale, që është trusti rajonal i Shëndetësisë për rajonin e Lombardisë.
Pas Berlusconit, vijuan me radhë Giorgio Armani, Dolçe e Gabana, Donatella Versaçe, familja Agnelli që zotëron perandorinë e FIAT, e shumë e shumë të tjerë.
Sa që komisari special për shëndetësinë i Lombardisë deklaroi publikisht se nuk ishin problem paratë por blerja e respiratorëve pasi ishin bllokuar kanalet ndërkombëtare të eksportit.
Ndërkaq, pasanikët nisën të kanalizojnë paratë nëpër bashki e komitetet vendore të emergjencës në qytete, pikërisht për të ndihmuar qytetarët në mënyrë që të rrinin në shtëpi. Ushqime falas, ekipe hidraulikësh, elektriçistësh e shumë të tjerë që u vinin në ndihmë familjeve të izoluara.
Me këtë manovër, edhe ndihmoheshin qytetarët, edhe paguheshin ata që punojnë me profesione të pavarura, duke mos prekur zinxhirin ekonomik.
Po pse tek ne kanë heshtur e janë strukur oligarkët e mëdhenj. Në fakt strukur nuk janë, se një pjesë e rëndësishme e tyre po fitojnë masivisht nga spekulimet e rritjes së çmimeve. Shitjet e mallrave ushqimore kanë arritur një nivel të pandodhur më parë dhe natyrisht me çmime të ngritura në mesin e krizës.
Disa nga prodhuesit apo shitësit e produkteve janë ata: bosët e mëdhenj të vendit që po palosin miliardat e lekëve në xhepat e tyre që nuk ngopen kurrë. Dhe asnjë donacion, asnjë nismë, asnjë fond për të ndihmuar spitalin infektiv apo fasha të ndryshme qytetarësh që po humbin pagën dhe nuk paguajnë dot faturat normale si dritat, uji, për të cilat Edi Rama, mirë që nuk toleron, por as nuk zgjidh qesen e vet apo miqve të tij të ngushtë-oligarkëve që të hapin xhepat e stërfryrë që nuk dihet pse i mbajnë palë palë. Ku do i çojnë gjithato miliarda. Po sikur ti zërë ai virusi flamëmadh? Larg o Zot, por kjo heshtje e tyre sot, është jo thjesht e çuditshme, por ngjan cinike.
Po mire, po për tërmetin pse u treguan aq të zellshëm?!
E thjeshtë, atëherë flitej për plan rindërtimi, kontrata të mëdha për të ndërtuar pallate e komplekse shtëpish që mund të fitonin edhe më shumë, shumë më shuumë.
Po ku, ku do i çojnë aman… /Pamfleti
