Ishujt Komoros kanë qenë surpriza e madhe e këtij edicioni në Kupën e Afrikës. Në pjesëmarrjen e parë të tyre, skuadra e vogël, e cila tashmë cilësohet si “Hirushja” e turneut, bëri shumë mirë dhe ia doli që të kualifikohej mes 16 skuadrave më të mira.
Por pikërisht në momentin më të bukur, skuadra ishullore ka përjetuar dramën e një vale të Covid-19 që ka përfshirë ekipin. Pak ditë para sfidës me Kamerunin vendas kanë rezultuar pozitiv në grupin e skuadrës 12 persona, mes tyre edhe trajneri, Amir Abdou.
Por problemi më i madh është se dy të infektuar janë portierët Ouseini dhe Ahamada, ndërsa portieri i tretë, Ben Boina, është i dëmtuar. Kështu, skuadra do të paraqitet në ndeshjen ndaj Kamerunit, organizator i turneut dhe favorit për fitoren, pa pasur portierë në dispozicion, me një lojtar që do të stërvitet këto ditë për të qenë i gatshëm për duelin në këtë rol dhe me shpresën që ndonjë prej portierëve të infektuar të rezultojë negativ.
