Përfundon ndeshja e 1/16-ave të Kupës së Gjermanisë. Bajerni i Mynihut është eliminuar nga Holstein Kiel. Skuadra që militon në kategorinë e dytë gjermane ka eliminuar kampionët e Gjermanisë dhe Europës falë gjuajtjeve të 11-metrshave. Gnabri zhbllokoi ndeshjen për bavarezët pas një gabimi nga ana e portierit të vendasve në minutën e 14.
Vendasit u kundërpërgjigjën në minutën e 37 me 33-vjeçarin Bartels, që kapi në befasi mbrojtjen e Bajernit.
Në minutën e 48, Sane shënoi golin e fitores dhe të kualifikimit për Bajernin. Kur mendohej se kampionët e Gjermanisë do të kalonin në raundin tjetër, Kiel barazoi shifrat me Wahl në minutën e 95.
Në ndeshjen tjetër, Barcelona është kualifikuar në finalen e Superkupës së Spanjës, duke nxjerrë jashtë loje Real Sociedadin nga pika e bardhë e penalltive, pasi koha e rregullt dhe 30 minutat e shtesës përfunduan në barazim 1-1.
Skuadra e Kuman kaloi e para në avantazh falë një supergoli të Frenki De Jong, i cili pas një asisti perfekt të marrë nga Grizman në minutën e 39’, ia doli ta dërgojë topin në fundin e rrjetës.
Që në fillim të pjesës së dytë, Sociedadi u shfaq më kërkues dhe gjeti golin e barazimit në minutën e 51’ me Ojarzabal që shënoi nga pika e bardhë e penalltisë. Pas kësaj, ndeshja u bë akoma më e bukur, me të dyja skuadrat që krijuan disa raste për shënim, por pa sukses.
Rezultati nuk ndryshoi as pas kohës shtesë dhe skuadrat iu drejtuan penalltive. Aty portieri i Barcelonës Ter Shtegen bëri heroin, duke mbrojtur dy gjuajtje të Sociedadit, ndërsa një u përplas në shtyllë.
Mbrëmjen e nesërme, Barcelona do të mësojë kundërshatrin që do të ketë përballë në finale, që do të përcaktohet nga çifti Real Madrid-Atletik Bilbao.
