Kryeministri Edi Rama, së bashku me ministrat e emëruar prej tij në mandatin e ri qeverisës, pritet që ditën e sotme në orën 10:00 të paraqiten në presidencë për t’u betuar para presidentit Ilir Meta ashtu siç e kërkon procedura në Kushtetutë.
Betimi i ministrave do të zhvillohet në ambientet e Presidencës, ku do të jenë të pranishëm të gjithë ministrat e rinj të kabinetit të përbërë nga 12 gra dhe 4 burra.
Qeveria socialiste mori votëbesimin në seancën maratonë, e cila filloi në orën 10:00 të së enjtes dhe përfundoi mëngjesin e të premtes. Kabineti i ri qeveritar pas debateve të shumta me palën opozitare, mori 77 vota pro, 53 kundër dhe 1 abstenim.
Nga ana tjetër, edhe pse do të kërkojë miratimin e Metës, Rama dhe të tijët më herët morën një nismë ku Kuvendi shkarkoi presidentin me 104 vota, me argumentin që ai kishte bërë “shkelje të rënda të Kushtetutës”.
Pavarësisht kësaj Meta vijoi detyrën pasi nuk pati një vendim nga Gjykata Kushtetuese, që do të vuloste fatin përfundimtar të Ilir Metës.
