Zbardhet dëshmia e Plaurent Dervishajt, kunatit të Lul Berishës. Dervishaj ka deklaruar se nuk i ka parë autorët në momentin që kanë qëlluar në drejtim të makinës së tyre.
Ditën e sotme, Dervishaj është marrë në pyetje nga policia pasi ndodhej në gjendje të mirë shëndetsore dhe iu gatshëm për të dhënë dëshminë e tij. Dervishaj ka deklaruar se nuk i ka parë autorët në momentin që kanë qëlluar në drejtim të makinës së tyre.
Ndërsa pritet ende që të merret dëshmia e të plagosurit tjetër, Juljan Meçe, i cili ndodhet në gjendje më të rëndë shëndetësore se Dervishaj.
Atentati ndaj tyre ndodhi ditën e djeshme, ku dy persona ende të paidentifikuar qëlluan me mbi 45 plumba kallashnikovi makinën e Dervishajt. Dyshimet kryesore lidhen me aktivitetin e dy personave me fajdet në Durrës apo trafikun e drogës.
Por nuk lihet jashtë edhe pista e larjeve të hesapeve mes bandave në Vlorë dhe Fier, duke marrë paraysh faktin që Dervishaj është kunati i Lul Berishës.
Lulzim Berisha njihet si truri i “Bandës së Durrësit”, një organizatë kriminale përgjegjëse për disa krime të rënda në vend.
Banda e Durrësit e ka nisur aktivitetin e saj që prej vitit 1998, ku Lulzim Berisha, në bashkëpunim me Plaurent Dervishaj, Adriatik Colin, Klodian Saliun dhe Ilir Xhungën vranë me armë zjarri Dritan Sallakun.
